Yashyizweho kuri26 April, 2019 | 23:37

Rubavu:Babiri bafatanywe ibiro 125 n’udupfunyika 1230 by’urumogi bari bajyanye i Kigali

Abantu babiri bafatiwe mu bikorwa byakorewe mu turere twa Rubavu na Nyarugenge bigamije kurwanya abatunda bakanakwirakwiza ibiyobyabwenge mu gihugu.

Ibi bikorwa byakozwe kuri uyu wa Kane tariki 25 Mata byafatiwemo ibiro 125 n’udupfunyika 1230 by’urumogi.

Umuvugizi wa Polisi mu Ntara y’Iburengerazuba Chief Inspector of Police (CIP) Innocent Gasasira yavuze ko ibi biyobyabwenge ndetse n’abakekwa ho kubicuruza bafatiwe mu bikorwa byateguwe na Polisi ishami rishinzwe kurwanya ibiyobyabwenge Anti-Narcotics Units (ANU).

Yagize ati "Aba bafashwe hasanzwe hari amakuru ko ari bamwe mu bakwirakwiza ibiyobyabwenge, nyuma y’aya makuru Polisi yarabagenzuye bafatwa bafite ruriya rumogi bari bajyanye mu mujyi wa Kigali".

Akomeza avuga ko umwe mu bacuruza ibiyobyabwenge Charlene Bazihira yafatiwe mu karere ka Rubavu mu murenge wa Gisenyi mu kagari ka Mbugangari afite biriya biyobyabwenge yari akuye muri Congo Kinshasa.

Bazihira w’imyaka 19 y’amavuko avuga ko ibikorwa byo gucuruza ibiyobyabwenge yabishowemo na Evelyne Uwineza nawe wahise afatirwa mu mujyi wa Kigali.

CIP Gasasira yaburiye abantu batunda, abacuruza ndetse n’abakwirakwiza ibiyobyabwenge ko babireka kuko amayeri yose bakoresha yamenyekanye.

Yavuze ko amwe muri ayo mayeri bakoresha batwara ibiyobyabwenge harimo ababitwara mu biribwa, ababishyira mu tujerekani nk’abatwaye ibinyobwa, mu migati, mu mapine y’amagare n’andi mayeri menshi atandukanye bakoresha.

Aha yagize ati” Amayeri ayo ariyo yose ababikora bakoresha n’andi bateganya kuzakoresha Polisi ifatanyije n’abaturage izayatahura, uzabigerageza wese azahura n’ingaruka zikomeye.”

CIP Gasasira yabibukije ko ibiyobyabwenge bigira ingaruka kubabicuruza, ababinywa ndetse no ku muryango nyarwanda muri rusange; bikanakurura ibindi byaha biteza umutekano birimo urugomo,amakimbirane mu miryango ,gukubita no gukomeresta, gufata ku ngufu n’ibindi. Niyo mpamvu kubirwanya bikwiye kuba ibya buri wese agira uruhare mu gutanga amakuru y’ababikora.

Gutunda, gucuruza no gukwirakwiza ibyiyobyabwenge bihanwa n’ ingingo ya 263 mu gitabo giteganya ibyaha n’ibihano muri rusange aho uwabikoze ahanishwa igifungo kuva ku myaka irindwi(7) kugeza ku gifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe