Yashyizweho kuri30 April, 2019 | 12:16

Umujyi wa Kigali ku isonga mu hagaragaye ibyaha byinshi mu gihugu

Urwego rw’Ubushinjacyaha mu Rwanda RIB rwatangaje ko kuva muri Mata 2018 kugeza muri Werurwe 2019, mu gihugu hose hakozwe ibyaha bisaga ibihumbi 39 ariko umujyi wa Kagali ukaza ku isonga mu hakorewe ibyaha byinshi.

Ibi byatangajwe kuri uyu wa 29 Mata 2019, mu kiganiro n’abanyamakuru cyateguwe na RIB n’izindi nzego bafatanya mu gukumira no kugenza ibyaha barimo ihuriro ry’imiryango itanga ubufasha mu by’amategeko (LAF).

Raporo yakozwe na RIB mu gihe cy’umwaka imaze igiyeho,ikaba yamurikiwe itangazamakuru, igaragaza ko ibyaha muri uwo mwaka hakozwe ibyaha bisaga ibihumbi 39.

Muri ibyo byaha,10 byaje ku isonga byihariye hejuru ya 73% y’ibindi byaha muri rusange bigizwe n’ibyaha byo gukubita no gukomeretsa, ubujura bworoheje, ibiyobyabwenge, gusambanya abana, ubujura buciye icyuho n’ibindi.

Muri ibi byaha byose bisaga ibihumbi 39,umujyi wa Kigali ugaragaramo ibyaha byinshi birimo gukubita no gukomeretsa, ubujura no gusambanya abana.Naho intara y’Uburasirazuba ikaza ku mwanya wa kabiri,Uburengerazuba ku mwanya wa Gatatu,Amajyepfo ku mwanya wa gatatu naho intara yakorewemo ibyaha bicye ni Amajyaruguru.

Uturere tuza ku isonga twagaragayemo ibyaha byinshi ni Gasabo, Kicukiro Nyarugenge mu mujyi wa Kigali, Nyagatare na Gatsibo (Uburasirazuba) mu gihe uturere twa Nyamasheke,Ngororero (Uburengerazuba),Nyanza na Nyaruguru (Amajyepfo) ari two twagaragayemo ibyaha bike.

Gusa Twagirayezu Jean Marie, Umuyobozi w’Ishami rishinzwe kugenza ibyaha muri RIB,yavuze ko muri ibyo byaha hari ibyagabanutse ibibindi biriyongera ariko ahanini ngo kwiyongera kwabyo kwatewe n’impamvu zirimo nk’iterambere n’ubufatanye bw’ibihugu aho usanga hari bamwe mu bantu baza mu Rwanda hakazamo n’abafite imigambi itari myiza.

Ati”Ukugabanuka kw’ibyaha byinshi biterwa n’imbaraga nyinshi zashyizwemo n’ubufatanye n’abaturage ndetse n’abandi bafatanyabikorwa”.

Akomeza agira ati “Impamvu zituma hari ibyaha byiyongera zirimo iterambere,ubukungu ndetse n’ubufatanye bw’ibihugu haba mu karere no ku isi muri rusange aho usanga hari ibikorwa bigenda bikurura abantu batandukanye baturuka hanze ,ku buryo muri bo hazamo n’abafite imigambi itari myiza yo gukora ibyaha”.

Avuga kandi ko ibindi byaha byagaragaye cyane ari ibishingiye ku ihohoterwa, aho kuva Mata 2018 kugeza Werurwe 2019 hagaragaye ibisaga ibihumbi bitandatu byihariye hafi 27% y’ibyaha byakozwe hose mu gihugu.

Ibyo byaha bishingiye ku ihohoterwa birimo gusambanya abana, ubusambanyi muri rusange, gukubita no guhohoterwa bikorerwa mu ngo.Imibare igaragaza ko mu byaha ibihumbi 6383,abahohotewe cyane ari abagore kuko hahohotewe abagera ku bihumbi 5611 naho abagabo ni 772 gusa.

RIB kandi irishimira intambwe imaze guterwa mu igabanuka ry’ibyaha cyane cyane iby’ingengabitekerezo ya Jenoside kuko muri uyu mwaka wa 2018-2019 hagaragayemo ibyaha by’ingebitekerezo ya Jenoside 442 mu gihe mu mwaka wa 2017-2018 byari 505.
Abananyamakuru barasabwa ubufatanye mu gutuma ibyaha bigabanuka kuko bafite ubushobozi bwo gutahura aho ibyaha biba biri gukorerwa n’aho bigiye gukorerwa
Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru