Yashyizweho kuri11 June, 2019 | 22:25

Nyarugenge:Babiri batawe muri yombi bashinjwa gukora ibirango by’ikigo cy’Igihugu n’imisoro n’amahoro

Abagabo babiri bo mu Karere ka Nyarugenge mu Mujyi wa Kigali, batawe muri yombi bashinjwa gukora ibirango by’ikigo cy’Igihugu n’imisoro n’amahoro (RRA) bakabishyira ku nzoga zitujuje ubuziranenge.

Kuri uyu wa Kabiri tariki ya 11 Kanama 2019 nibwo aba bagabo uko ari babiri barimo n’ufite akabari gaherereye mu Murenge wa Muhima, beretswe itangazamakuru. RRA ivuga ko batawe muri yombi ku bufatanye bwa Polisi n’urwego rushinzwe rushinzwe gukurikirana inyerezwa ry’imisoro.

Ishinja aba bagabo kugira ibirango bishyirwa ku nzoga bigaragaza ko zishyuye imisoro no kugira imifuniko y’inzoga bashyira ku zindi zirimo Bond 7, Waragi, Gin n’izindi, bakazitirira ko zikorwa n’uruganda rwo muri Uganda.

Gusa n’ubwo ibyo bafatanwe bigaragara aba bagabo uko ari babiri bahakanye ibyo bashinjwa.

Komiseri wungirije wa RRA Ushinzwe abasora, Mukashyaka Drocelle, ahamya ko ibirango bya RRA bishyirwa ku bicuruzwa bifite umwimerere wabyo ku buryo ntawapfa kubyigana, bityo ababikora bazajya bafatwa.

Ati “Hari ingamba zo kurinda ibirango bya RRA kuko ababikora bashyiraho ibirango bidashobora kwiganwa kandi iyo ubugereranije ubona itandukaniro kubera ko tugira n’imashini zibigaragaza ku buryo muri ibi bikorwa byo kubigenzura ari zo zikoreshwa.”

Yakomeje avuga ko aba bagabo bagiye gushyikirizwa inzego zibishinzwe, anasaba abacuruzi ko igihe bagize amakenga ku birango biri ku bicuruzwa baguze bajya batungira agatoki RRA.

Nk’uko bitangazwa n’iki kigo ngo hagati ya Mutarama kugeza muri Mata uyu mwaka wa 2019, kimaze kugaruza akayabo k’amafaranga y’imisoro yanyerejwe angana na 737,437,447 Frw.
Komiseri Mukashyaka Drocelle ahamya ko ntawapfa kwigana ibirango bya RRA kuko biba bifite umwimerere wabyo ubwo uwabyigana yafatwa ako kanya
Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru