Yashyizweho kuri17 May, 2019 | 09:43

Nsabimana Callixte wiyita ‘Sankara bwa mbere yeretswe itangazamakuru [REBA AMAFOTO]

Nsabimana Callixte wiyita ‘Sankara’ wumvikanye yigamba guhungabanya umutekano w’u Rwanda, yeretswe itangazamakuru ku Cyicaro Gikuru cy’Urwego rw’Igihugu rw’Ubugenzacyaha (RIB) ku Kimihurura.

Mu gitondo cyo kuri uyu wa Gatanu tariki ya 17 Gicurasi 2019, abanyamakuru benshi bari babukereye ku cyicaro cya RIB, bahageze babwirwa ko Nsabimana atari buze kuvugana n’itangazamakuru ahubwo ko umwunganizi we mu mategeko ari bumuvugire.

Nsabimana yagaragaye yambaye ishati y’amaboko maremare irimo ibara ry’ubururu, ipantalo ya kaki n’amataratara y’umukara atwawe n’abapolisi babiri.Yahagaze imbere y’abanyamakuru benshi bari bitabiriye mu gihe cy’iminota itatu abona kongera gusohorwa.

Umwunganizi we yitwa Nkundabarashi Moise yavuze ko "Ibijyanye n’ibyaha aregwa bizatangazwa mu minsi iri imbere."

Yakomeje agira ati "Uwo nunganira ni we wampisemo. Abavoka dufite amategeko aturengera mu kunganira ukekwaho ibyaha. Kuvuga ko hari abavoka basabwe kumwunganira ntibabikore bafite ubwigenge bwabo."

Nkundabarashi wunganira Sankara mu mategeko yavaze kandi ko nta kibazo Nsabimana afite kuko aratekanye.

Ati“Nsabimana afite ubuzima bwiza, ibyo agomba kubona byose yarabibonye. Afunze mu buryo bukurikije a mategeko. Ndetse n’icyo akenera ku bugenzacyaha arakibona” .

Yafafashwe tariki 13 Mata 2019,bitangazwa ku mugaragaro ko yafashwe ndetse ari mu maboko ya RIB ku wa 30 Mata 2019, aho byemejwe na Minisitiri w’Ububanyi n’Amahanga, Dr Sezibera Richard mu kiganiro yagiranye n’itangazamakuru.

Nsabimana Callixte yavugaga ko ari umuvugizi w’umutwe wa politiki, MRCD, udahwema kwigamba ibikorwa by’ubugizi bwa nabi nk’igitero cyagabwe i Nyabimata mu Karere ka Nyaruguru mu 2018 n’icya Kitabi.

Nsabimana Callixte uzwi nka Sankara yari amaze iminsi afungiye mu Urwego rw’Igihugu rw’Ubugenzacyaha (RIB), akorwaho iperereza ku byaha aregwa.

Akurikiranyweho icyaha cy’iterabwoba ndetse anakurikiranyweho kandi bimwe mu byaha nawe yagiye yivugira birimo kurema umutwe witwara gisirikare.Dosiye ye iragezwa mu Rukiko bitarenze uyu munsi.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru