Yashyizweho kuri27 July, 2019 | 19:07

Ngoma:Abagabo babiri bafashwe bikoreye umufuka wuzuye urumogi

Mvuyekure Vincent ufite imyaka 43 y’amavuko na Sendwi Jean Pierre uzwi ku izina rya Musirikare w’imyaka 44 y’amavuko bombi bafatiwe mu murenge wa Jarama mu karere ka Ngoma bafite ibiro 17 by’urumogi.

Ifatwa ry’aba bagabo ryabaye kuri uyu wa Gatatu tariki 24 Nyakanga, ku bufatanye bwa Polisi y’u Rwanda ikorera mu Karere ka Ngoma, umurenge wa Jarama ndetse n’abaturage bahinga mu gishanga cy’akagera.Biracyekwa ko urwo rumogi bari barukuye mu gihugu cy’Uburundi.

Umuvugizi wa Polisi mu ntara y’Iburasirazuba Chief Inspector of Police (CIP) Hamdun Twizeyimana yatangaje ko abo bagabo bafashwe biturutse ku makuru yatanzwe n’abaturage.

Yagize ati “Abaturage bahinga mu gishanga cy’Akagera baduhamagaye bavuga ko babonye abagabo babiri bikoreye umufuka bikekwa ko ari urumogi batwaye, twahise tuhagera dusanga koko ari urumogi bari bikoreye.”

CIP Twizeyimana yibukije ko ibiyobyabwenge bigira ingaruka ku babicuruza, ababinywa ndetse no ku muryango nyarwanda muri rusange; bikanakurura ibindi byaha biteza umutekano mucye birimo urugomo,amakimbirane mu miryango, gukubita no gukomeretsa, gufata ku ngufu n’ibindi. Niyo mpamvu kubirwanya bikwiye kuba ibya buri wese agira uruhare mu gutanga amakuru y’ababikora.

CIP Twizeyimana yaburiye abaturage kureka kwishora mu bikorwa byo gucuruza urumogi kuko inzego z’umutekano ziri maso.

Yagize ati “Polisi ntizihanganira na rimwe umuntu wese ushaka kwangiza umuryango nyarwanda akoresheje urumogi n’ibindi biyobyabwenge, cyane ko biturutse ku mikoranire myiza abaturage bamaze gusobanukirwa ingaruka mbi zabyo bagatanga amakuru ku gihe y’ababikoresha.”

Yongeyeho ko abo bagabo bemera ko urwo rumogi rwari urwabo ruturutse mu gihugu cy’Uburundi aho baruguze amafaranga 180,000 bakaba bari barujyanye mu karere ka Bugesera.

Yasoje asaba abaturage gukomeza gutangira amakuru ku gihe y’abacuruza ibiyobyabwenge kuko bigaragara ko bituruka mu bihugu by’abaturanyi.

Bakimara gufatwa bahise bashyikirizwa Urwego rw’Ubugenzacyaha (RIB) rukorera kuri Sitasiyo ya Jarama kugira ngo bakurikiranwe ku cyaha bacyekwaho.

Baramutse bahamwe n’icyaha cyo gucuruza no gukwirakwiza ibiyobyabwenge bahanishwa ingingo ya 263 mu gitabo giteganya ibyaha n’ibihano muri rusange.

Aho ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko aba akoze icyaha.

Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye; bibarizwamo n’urumogi

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe