Yashyizweho kuri17 July, 2019 | 12:26

Lt Mutabazi ku cyaha cyo gusebya umukuru w’igihugu ati’’Ibyo ikinyamakuru The Times cyatangaje cyongeyemo umunyu’’

Lt Joel Mutabazi ubwo yitabaga urukiko ku nshuro ya kabiri yikurikiranya nyuma y’uko ku wa Mbere nabwo yari mu rukiko,yahakanye ibyaha ashinjwa birimo kugirira nabi ubutegetsi no gusebya umukuru w’igihugu mu bitangazamakuru ndetse no gufatanya na Kayumba Nyamwasa utavuga rumwe n’ubutegetsi bw’u Rwanda.

Yabihakanye kuri uyu wa kabiri, tariki 16 Nyakanga 2019 ubwo we n’abandi 10 baregwa hamwe bitabaga Urukiko rw’Ubujurire, ku bujurire bwabo ku myanzuro y’urubanza rwaciwe n’Urukiko Rukuru rwa Gisirikare.

Yisobanura ku cyaha cyo gushaka kwica umukuru w’igihugu, Lt Mutabazi yahakanye ibirego byemeza ko yemereye umutwe wa RNC kurasa umukuru w’igihugu no guhabwa amadolari 3000 y’Amerika yo kubitegura.

Ubushinjacyaha bwo buvuga ko yatekereje gukora iki cyaha ubwo yari amererwe nabi n’ubukene agashaka kubukira abinyujije muri iyo nzira aho yari mu buhungiro.

Gusa kuri Mutabazi yavuze ko nta narimwe yigeze agira ikibazo cy’inzra mu buhungiro kuko ngo yabaga muri Hoteli yishyurwa n’ishami rya ONU ryita ku mpunzi kandi ngo yanabonaga n’ubufasha bw’abavandimwe ku bwinshi.

Ku cyaha cyo gukwirakwiza ibihuha yahamijwe n’urukiko rwa gisirikare no kuvuga amagambo asebya umukuru w’igihugu,Lt Mutabazi ibi yabihakanye.

Ngo ibi bikubiye mu kiganiro yagiranye n’ikinyamakuru The Times cyo mu Bwongereza aho yavuze ko Perezida Kagame ari umugome w’umwicanyi, ko yamwiboneye ahagarikira ubwicanyi bwakorewe inzirakarengane.

Ikindi ngo yashinje Perezida Kagame kuba umunyagitugu udashobora kwihanganira n’abatavuga rumwe nawe na rimwe.

Lt Mutabazi yisobanuye ko uwo munyamakuru koko baganiriye ibintu byinshi ndetse amwereka n’amafoto ye akuramo ayo akeneye ariko atari azi ko azabikoresha mu nkuru azakora.

Yavuze ko baganiriye byinshi ku mateka y’ubuzima bwe, cyane urugendo rwe kuva mu Rwanda kugera mu buhungiro muri Uganda ariko iyo nkuru yaje gusohoka irimo bicye cyane mu byo baganiriye nka 1/4, ibindi ari ibyo bamugerekeye.

Kuri ibyo byanditswe n’icyo kinyamakuru ati"Byinshi mu byo cyavuze cyabyongeyemo umunyu".

Avuga ko yaganiriye na cyo kimusabye kuvuga amateka ye ndetse ko hariho umugambi wo kuyandikamo igitabo, atiyigeze amenya ko ibyo yavuze byagombaga gusohoka mu kinyamakuru.

Perezida w’Inteko iburanisha yahise abaza Lt Mutabazi impamvu babonye iyo nkuru bagasanga ibiyirimo atari ukuri bihabaye n’ikiganiro bagiranye ntibashake umunyamakuru wayikoze ngo ayivuguruze cyangwa ngo bamurege.

Lt Mutabazi yiregura avuga ko nta mategeko n’amabwiriza bigenga umwuga w’itangazamakuru yari azi.

Kayumba wari umusirikare mukuru ngo ntamakuru yari gukenera kuri Mutabazi wari muto

Ku mugambi wo kugirira nabi igihugu, Mutabazi yamaganye ibivugwa n’ubushinjacyaha ko yari yemeye gukorana na Kayumba Nyamwasa ndetse n’inzego z’ubutasi z’Africa y’Epfo ngo abashakire amakuru ajyanye n’ubwirinzi bw’igihugu n’akarere.

Mutabazi avuga ko yinjiye mu gisirikare asanga Kayumba akuriye iperereza bityo ko nta makuru yari gukenera ku musirikare muto nka we.

Antoinette Mukamusoni na Amani Jean de Dieu,bunganira Mutabazi, babwiye urukiko ko Lt Mutabazi atagize amahirwe yo kubaho ubusore bwe kuko ngo yinjiye mu gisirikare afite imyaka 12, imyaka ye yose ayimara mu gisirikare mbere yo gufungwa azira icyo bavuga ko ari akarengane.

Ikindi kandi bavuze ko hari impamvu basanga urukiko rw’ikirenga rwashingiraho rumugabanyiriza ibihano. Bavuzemo kuba yaragize uruhare mu rugamba rwo kubohora igihugu no guhagarika Jenoside, kuba agifite umutima ukunda igihugu kandi yiteguye gukomeza kugikorera, kuba bimwe yarabikoze abitewe n’uburakari n’ibindi.

Aha ubushinjacyaha bwavuze ko igihano yahawe kimukwiriye kuko yagiranye ibiganiro n’abagize imitwe y’iterabwoba yifuza guhungabanya umutekano w’igihugu irimo RNC ya Kayumba na FDLR bityo ko nta cyizere gihari cy’uko yakongera gukorera neza igihugu ndetse kuba yaraburanye ahakana ibyaha kandi asa n’uhanganye.

Umucamanza abajije Lt Mutabazi icyo abivugaho, yavuze ko "mu rukiko atari mu ntebe ya penetensiya ku buryo yari kuburana mu bwitonzi budasanzwe".

Yavuze kandi ko ibyaha yahamijwe n’Urukiko Rukuru rwa Gisirikare byose nta bimenyetso bifatika byashingiweho ariko bisuzumwe neza hakurikijwe amategeko bikamuhama yababarirwa.

Ati “Igihe ibyo byaha byagaragara ko bimpama, mwazambabarira nkaba nagabanyirizwa ibihano cyangwa nkaba narekurwa ngasubira mu buzima busanzwe.

Urukiko rwakomeje kumva ukwiregura kw’abandi bareganwa na Lt Mutabazi barimo Joseph Nshimyimana ufatwa nk’umufatanyabyaha wa Mutabazi ndetse nawe akaba yarakatiwe igifungo cya burundu bwira batarangiye ruhita rufata umwanzuro wo kuzasubukura ku wa 22 Nyakanga 2019 saa 11:00 ari nayo tariki urubanza ruzasozwa.

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


1 Comment

Niyigena Evariste - 4 months ago

Nibakagende basebya kagame kuko nacyo adakora ngo tubeho mumutekano

Izindi nkuru