Yashyizweho kuri5 May, 2019 | 15:35

Kabuga-Masaka:Abarokotse Jenoside barasaba ko hafatwa abishe ababo bihishe mu turere dutatu tw’Intara y’Amajyaruguru

Imiryango y’abarokotse Jenoside biciwe ababo mu mirenge ya Masaka mu karere ka Kicukiro na Kabuga mu karere ka Gasabo ahitwa mu Gahoromani baravuga ko ababahemukiye bakiri kwidegembya mu bice bimwe na bimwe by’intara y’amjyaruguru.

Kuri uyu wa gatandatu tariki 04 Gicurasi 2019 ku rwibutso rwa Nyanza ya Kicukiro hashyinguwe imibiri 84,415, yavanywe mu byobo byari byarubatsweho inzu z’abaturage kuva mu mwaka ushize wa 2018 kugeza ubu.

Imiryango y’abarokotse Jenoside ivuga ko i Kabuga na Masaka, Habyalimana yari yarahatuje abo mu miryango ye cyangwa abo mu gace akomokamo, kuko ari mu rwinjiriro rw’umujyi wa Kigali, akaba ngo yari agamije kwizera ko umutekano we urinzwe.

Barisa Denis uhagarariye imiryango y’abagiye gushyingura ababo biciwe mu Gahoromani avuga ko bajyaga baherekeza abajya gushyingura mu rwibutso rwa Ruhanga mu karere ka Gasabo bagira ngo n’ababo barimo.

Ati" Agahinda kagiye gushira kuko tuzi ko abacu baruhukanye n’abandi hano mu rwibutso rwa Nyanza ya Kicukiro".

Yakomeje asaba Leta gukora ibishoboka igafata bamwe mu bantu ababahekuye bikidegembya mu cyahoze ari Ruhengeri.

Ati"Ariko turasaba Leta gufata abatwiciye abacu bakirimo kwidegembya mu Ruhengeri (Musanze, Burera na Nyabihu)".

Barisa avuga ko abo babahekuye bageze i Kabuga na Masaka hagati ya za 85 na 90,ubwo nyuam ya Jenoside yakorewe Abatutsi 1994 ngo bahise basubira iwabo bamaze kwica imbaga y’abantu itabarika.

Prof Jean Pierre Dusingizemungu,Perezida w’umuryango Ibuka urengera inyungu z’abarokotse Jenoside,we avuga ko uretse abatarafatwa, ngo n’abari bafungiwe Jenoside barimo kurekurwa nabo bateye impungenge.

Ati"Ntabwo bateguwe bihagije ngo bagere ku rwego rwo gusubizwa mu muryango nyarwanda, ntabwo bicujije baracyafite imigambi yo kwica, inka z’abarokotse Jenoside ziratemwa hirya no hino mu gihugu.".

Prof Dusingizemungu avuga kandi ko muri iyi myaka itanu uhereye 2019-2023 Leta y’u Rwanda iteganya kurekura abafungiwe Jenoside 8,857 bazaba barangije ibihano byabo.

Gusa uyu muyobozi wa Ibuka aboneraho gusaba Leta guteganya ubushobozi buhagije bwo kubanza kuganiriza abo bantu mbere yo kubana n’abo biciye ababo.

Minisitiri w’Ubutabera akaba n’Intumwa Nkuru ya Leta Johnson Busingye wifatanije n’Abanyarwanda bashyinguye ababo i Nyanza, avuga ko kugira ngo ubutabera bugerwego hazasabwa ubufatanye bw’Abanyarwanda b’ingeri zose.

Agira ati" Abahisha imibiri y’abishwe muri Jenoside bigatuma badashaka kwirega no kwemera icyaha, si ikibazo Leta igomba kureka, hazanozwa amategeko hashyirweho n’andi ariko iki kibazo kirangire".

Naho ku mpungenge zagizwe na Prof Dusingizemungu z’uko abarangiza ibihano basubira mu miryango yabo "badateguwe" bagaruka bafite imigambi mibisha, Minisitiri Busingye yasubije ko Leta igomba kujya ibarekura habanje kumenyekana ko nta kibazo bazateza mu muryango Nyarwanda.

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru