Yashyizweho kuri21 October, 2019 | 13:03

Mugesera yanze umucamanza ngo kuko amwanga urubanza rurasubikwa

Mu rukiko rw’ubujurire i Kigali, Leon Mugesera yavuze ko umwe mu bacamanza b’urukiko rw’ubujurire amwanga bityo atagomba kuba mu bamuburanisha, ibi byatumye urubanza rusubikwa.

Ubwo bari bamuhaye ijambo ngo asubanure ubujurire bwe, Leon Mugesera yasabye ibintu bibi; kumenya amazina y’abamuburanisha no kwemererwa kuburana yicaye kubera uburwayi.

Yemerewe kuburana yicaye, ariko umucamanza amubwira ko atari ngombwa ko abacamanza bivuga amazina, ko amenya gusa ko ari ab’urukiko rw’ubujurire bari kumuburanisha.

Bwana Mugesera yatsimbaraye avuga ko bagomba kuyamubwira kuko hari ubwo yasanga hari uwo bafitanye ikibazo akamwihana (akamwanga).

Umucamanza yamubwiye ko bagiye kumwibwira wenyine, maze baramuhamagara imbere, we n’umwunganizi we Jean Felix Rudakemwa, begera abacamanza bababwira amazina yabo.

Mugesera yahise avuga ati: "Uwitwa Kaliwabo Charles ndamwihannye kubera urwango amfitiye".

Yavuze kandi ko hari ibyemezo uyu yamufatiye mu rukiko rukuru.

Umuburanyi ntashobora kuburanishwa iyo hari umucamanza adashaka.

Umucamanza yahise ategeka ko iburanisha risubikwa kugira ngo urukiko rusuzume impamvu zo kuba uregwa yihannye umwe mu nteko y’abacamanza.

Mugesera w’imyaka 64, uyu munsi yari agarutse mu rukiko nyuma y’imyaka itatu akatiwe gufungwa burundu.

Yari yambaye ishapure ndende, aboneka nk’udafite imbaraga z’umubiri zihagije, birashimangirwa gusaba kuburana

Iburanisha rigitangira, umucamanza yasubiyemo kenshi abwira abanyamakuru ko batemerewe gufata amajwi no gufotora.

Hanze y’urukiko abacungagereza babuzaga uwariwe wese kwegera no gufotora Leon Mugesera.

Mugesera w’imyaka 64 yoherejwe mu Rwanda na Leta ya Canada tariki 23/01/2012.

Nyuma y’imyaka ine aburana, mu kwezi kwa kane 2016 yahamwe n’ibyaha bya Jenoside n’ibyibasiye inyoko muntu, urukiko rukuru rumuhanisha gufungwa burundu.

Ibyaha yahamijwe bishingiye ku ijambo yavugiye ku Kabaya mu 1992, ubu ni mu karere ka Ngororero mu burengerazuba bw’u Rwanda, ashinjwa ko ryahamagariraga Abahutu kwica Abatutsi.

We ahakana ibyaha aregwa.

Urukiko ntabwo rwatangaje itariki uru rubanza mu bujurire ruzasubukurwaho

Chief editor MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru