Yashyizweho kuri10 July, 2019 | 21:56

Kayonza:Gitifu yatawe muri yombi acyekwaho kunyereza amafaranga asaga ibihumbi 800 y’abaturage

Umunyamabanga Nshingwabikorwa w’Akagari ka Cyarubare gaherereye mu Murenge wa Kabare, ari mu maboko y’urwego rw’igihugu rw’ubugenzacyaha RIB acyekwaho kunyereza amafaranga 827 500 Frw y’abaturarage.

Uyu muyobozi witwa Esperance Kibukayire, yatawe muri yombi aho bivugwa ko aya mafaranga ari ayo abaturage bakusanyirije kubaka ibyumba by’amashuri kandi akaba yarayanyereje umwaka ushize.

Iperereza ryakozwe na RIB rigaragaza ko yakusanyijwe n’abaturage bafatanyije n’ababyeyi barerera ku rwunge rw’amashuri rwa Kiburara, bakayamuha ngo ayajyanye kuri Sacco ariko ntayajyane.

Modeste Mbabazi, Umuvugizi wa RIB yemeje ko uyu muyobozi yatawe muri yombi, akaba afungiye kuri Sitasiyo ya Mukarange mu gihe iperereza rikomeje.

Mbabazi yaburiye abitwaza imyanya y’ubuyobozi bafite bagakoresha mu nyungu zabo imitungo y’abaturage igamije gukoreshwa muri gahunda z’iterambere.

Ati “Kunyereza umutungo watanzwe n’abaturage byakozwe n’uriya Munyamabanga Nshingwabikorwa bituma batakaza icyizere kandi bibangamira imbaraga bashyizemo ngo bagire ibyumba byinshi by’abanyeshuri.”

Yavuze ko RIB izakomeza gushakisha no kugaragaza abakora ibyaha ariko anasaba abaturage gutangira amakuru ku gihe ku bayobozi babigiramo uruhare.

Uyu muyobozi nahamwa n’icyaha, azahanishwa igifungo kitari munsi y’imyaka irindwi ariko kitarenze imyaka icumi, n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’umutungo yanyereje.

JPEG - 153.3 kb
Ibiro by’umurenge wa Kabare mu karere ka Kayonza

MUHABURA.RW


Tanga igitecyerezo

Ibitekerezo


Tanga igitekerezo


1 Comment

- 3 months ago

Natweturababaye baduca amafaranayirondo ntaryobarara kandiburikwezi1000 birababajepe nyagare,rukomo,rurenge

Izindi nkuru