Yashyizweho kuri1 October, 2018 | 07:26

Kayonza: Gukunda umugore cyane byatumye umugabo yihekura yiyicira abana be babiri

Umugabo wo mu Murenge wa Mwiri, ashinjwa ko mu ijoro rishyira ku wa Gatandatu yishe abana be babiri, umukobwa n’umuhungu, nyuma y’igihe atandukanye na nyina ubabyara.

Ahagana mu ma saa tatu n’igice zo mu ijoro ryo ku wa 28 Nzeri 2018, uwo mugabo akekwaho ko yishe abana be, umuhungu w’imyaka 10 n’umukobwa w’imyaka umunani.

Bimwe mu bitangazwa na bamwe mu baturanyi b’uyu mugabo ni uko umugore we yari amaze igihe kigera ku mwaka yahukanye kujya kumucyura aramutsembere ngo kugaruka cyeretse abo bana batagihari.

Umwe yagize ati “Umugore we yari amaze nk’umwaka yahukanye, noneho umugabo akaba yari yarashatse undi mugore witwa Mukeshimana Solange nawe akaba yari amaze iminsi yahukanye. Umugabo rero ngo yagiye kumucyura umugore amubwira ko atazagaruka muri urwo rugo hakiri abo bana babiri yishe.”

Habanabakize Innocent Umunyamabanga Nshingwabikorwa w’umusigire w’Umurenge wa Mwiri, yavuze ko amakuru avugwa n’aba baturage nabo bayumvise.

Habanabakize yagize ati “Abaturage natwe batubwiye ko uriya mugore wa kabiri yari yaravuze ko atazagaruka mu rugo abo bana bakirurimo, kuri ubu nawe akaba yatawe muri yombi ngo hakorwe iperereza.”

Mbabazi Modeste,umuvugizi wa RIB, yatangarije umunyamakuru ko uyu mugabo ukekwaho kwihekura afungiye kuri sitasiyo ya Polisi ya Mwiri.

Yagize ati “Yatawe muri yombi akaba afungiye kuri sitasiyo ya polisi ya Mwiri, ariko baraza kumujyana i Gatsibo. Ibivugwa n’abaturage ku birebana n’uwo mugore wa kabiri turacyabikoraho iperereza.”

Uyu mugabo ni yaramuka ahamwe n’icyaha cyo kwihekura abigambiriye, azahanishwa ingingo ya140 yo mu gitabo cy’Amategeko ahana ibyaha mu Rwanda ivuga ko kwica umuntu ubigambiriye ari icyaha cy’Ubwicanyi, gihanishwa igifungo cya burundu.

Yanditswe na Habarurema Djamali


Tanga igitecyerezo

Amazina
Ubutumwa

1 Comment

- October 2018

eheeeee birabaje cyanepe!turimuhebyama nyasani nadutabare! nahundi birababaje nukuri?

Izindi nkuru