Yashyizweho kuri29 April, 2019 | 23:59

Karongi:Manirarora yasubijwe moto ye yibwe n’uwo basangiraga inzoga mu kabare

Abagabo babiri batawe muri yombi bacyekwaho kwiba moto ya Manirarora Jean d’Amour,ifite ibirango TVS RD 224 B yibwe ku mugoroba wo kuwa 6 Mata gusa umwe muri bo barimo barasangira inzoga.

Igikorwa cyo gufata aba bagabo cyabaye kuri uyu 28 Mata aho Polisi y’u Rwanda ikorera mu karere ka Karongi umurenge wa Bwishyura aho bivugwa ko umwe muri aba bagabo yarimo gusangira inzoga na Manirarora maze akamuca inyuma akajya kumutwara moto ye.

Chief Inspector of police (CIP) Innocent Gasasira Umuvugizi wa Polisi y’u Rwanda mu Ntara y’Iburengerazuba yavuze ko ku makuru bari bamaze guhabwa n’abaturage bafashe abagabo babiri Nzabamwita Emmanuel na Ndayishimiye Eric bari guhamburira moto muyindi.

Yagize ati “Manirarora Jean d’Amour yari ku kabari ari kumwe na Nzabamwita Emmanuel barigusangira Nzabamwita aza guca inyuma Manirarora amutwara moto ye,asohotse arayibura ahita yitabaza inzego z’umutekano ziza kuyimufatana barimo kuyikuramo ibyuma babishyira mu yindi moto, ibyo bita kubagira moto mu yindi.”

CIP Gasasira yakomeje asaba abantu kujya babanza kureba aho bagiye guparika ibinyabiziga byabo niba hagaragara kandi hari umutekano uhagije kuburyo ikinyabiziga kitakwibwa cyangwa cyibe cyakwangizwa .

Yakomeje akangurira abantu ko bakwiye kujya babanza gushishoza bakamenya umuntu bari kumwe imico ye kuko uwibwe moto yayibwe nuwo basangiraga inzoga.Agasaba abaturage guhaguruka bakarwanya ubujura kuko buri mubiteza umutekano mucye.

Yagize ati”Abantu bakwiye gukunda umurimo kuruta gushaka gutwara utw’ abandi bavunikiye kuko nibyo byonyine bizatuma iterambere ryabo rigerwaho.”

CIP Gasasira asoza ashimira abaturage kumakuru batanga kugirango ibyaha bikumirwe.abasaba gukomeza kujya batanga amakuru kandi bakayatangira ku gihe.

Nzabamwita Emmanuel na Ndayishimiye Eric bakekwaho ubujura bashyikirijwe urwego rw’ubugenzacyaha (RIB) bukorera station Bwishyura kugirango bakurikiranwe.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru