Yashyizweho kuri2 September, 2020 | 13:29

Kabuga Felicien ategereje umwanzuro wa nyuma w’urukiko

Urukiko mu Bufaransa, kuri uyu wa 2 Nzeri rwatangiye gusuzuma ubusabe bwa Kabuga Félicien usaba kuburanira mu Bufaransa, mu gihe urukiko rwa mbere rwemeje ko agomba koherezwa mu Rwego rwasigariyeho Urukiko mpuzamahanga Mpanabyaha rwashyiriweho u Rwanda, IRMCT, nk’uko impapuro zisaba ko afatwa zabiteganyaga.

Kabuga w’imyaka 84 ufatwa nk’umuterankunga wa Jenoside yakorewe Abatutsi mu 1994, yafatiwe mu gace ka Asnières-sur-Seine mu Bufaransa, ku wa 16 Gicurasi 2020.

Ku wa 3 Kamena nibwo Urukiko rw’Ubujurire rw’i Paris rwanzuye ko agomba kohererezwa Urwego rwasigariyeho ICTR, akaba arirwo rumuburanisha. Kugeza afungiwe i Paris, ariko yajuririye Urukiko rusesa imanza arusaba kwemeza ko aburanishirizwa mu Bufaransa. Guhera kuri uyu wa 2 Nzeri rwatangiye gusuzuma ubujurire bwe.

SOMA INKURU BIFITANYE ISANO

France: Urukiko rugiye gusuzuma ubujurire bwa Kabuga ushinjwa kuba umuterankunga ukomeye wa Jenoside yakorewe Abatutsi
Umuyobozi w’Impuzamiryango iharanira ko abagize uruhare muri Jenoside yakorewe Abatutsi bagezwa imbere y’ubutabera, Alain Gauthier, yabwiye RFI ko hari icyizere ko n’urukiko rusesa imanza ruzategeka ko yohererezwa urwego rwasimbuye ICTR.

Ati "Kuri dosiye ya Kabuga, Urukiko rw’Ubujurire rwa Paris rwemeje ko agomba koherezwa, wenda bwa mbere akajya i La Haye, nyuma akazajya i Arusha mu rwego rwasigariye inkiko mpuzamahanga, rugomba kumuburanisha. Ndatekereza ko hatabayeho gutungurana, icyemezo cyo kohereza Kabuga kigomba gufatwa."

Gauthier avuga ko urubanza rwa Kabuga nirutangira kuburanishwa, ruzashyira ahabona uburyo yabaye mu Bufaransa imyaka ingana itya nta we umufata, mu gihe byabaga bivugwa ko yihishe muri Kenya n’ahandi.

By’umwihariko kandi hazahishurwa byinshi ku bufasha yahawe kugira ngo agere mu Bufaransa, ahabone ubwihisho agatinda gutabwa muri yombi.

Gauthier avuga ko mu bantu bakeneye ko nabo kugezwa imbere y’ubutabera harimo Agathe Habyarimana, Stanislas Mbonampeka uba mu Bubiligi wanabaye Minisitiri w’Ubutabera na Laurent Serubuga wabaye Umugaba wungirije w’Ingabo ku bwa Perezida Habyarimana.

Ku wa 25 Kanama, Umushinjacyaha w’Urwego rwasigariyeho inkiko mpuzamahanga zirimo urwari rwarashyiriweho u Rwanda (IRMCT), Serge Brammertz, yatangaje ko hari abashinjacyaha be bari mu Rwanda mu bikorwa bigamije kunoza dosiye ya Félicien Kabuga, mbere y’uko atangira kuburanishwa.

Brammertz yavuze ko yongereye umubare w’abashinjacyaha bakorera mu Rwanda, kuko hagikenewe uruhare rwabo kuri dosiye ya Kabuga, ndetse hari n’abandi bakekwaho uruhare muri Jenoside bagikeneye gufatwa.

Brammertz Ati "Ubu igikenewe ni uko dosiye inozwa neza, tugasubira ku batangabuhamya, abarokotse Jenoside, abatanze ubuhamya mbere tukareba niba bagihari, turimo gukorana n’Ubushinjacyaha ngo turebe ko haboneka ibimenyetso bishya, muri iki cyumweru tuzahura n’imiryango y’abarokotse Jenoside kugira ngo tujyanishe dosiye n’igihe, ku buryo izaba imeze neza mu gihe gito gishoboka, mbere y’uko urubanza rutangira."

Umushinjacyaha Mukuru w’u Rwanda, Havugiyaremye Aimable, yavuze ko byari ngombwa ko impande zombi zihura, by’umwihariko kuri dosiye ya Kabuga, hagamijwe kuyinoza mbere y’uko atangira kuburanishwa.

Ati "Urwandiko rumushakisha rwatanzwe mu 2007, ni byiza ko uyu munsi nyuma y’imyaka 13, ni ukureba ibyo bimenyetso byari bihari icyo gihe, no kureba uko bihagaze, n’uburyo dushobora kuba twabyongera tugendeye ku makuru mashya ashobora kuboneka."

Byitezwe ko Kabuga w’imyaka 84, mu minsi mike yakoherezwa i Arusha cyangwa akajyanwa i La Haye mu Buholandi, mu gihe hagaragazwa imbogamizi z’urugendo zishingiye ku cyorezo cya Coronavirus.

MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru