Yashyizweho kuri6 March, 2019 | 10:04

Igihugu cy’Ububiligi cyemereye u Rwanda kugeza mu nkiko byihuse abakurikiranweho ibyaha bya Jenoside

Mu ijwi ry’igihugu cy’Ububiligi,Umushinjacyaha Mukuru wungirije w’u Bubiligi Phillippe Meire yemereye u Rwanda kwihutisha kugeza mu nkiko zaho abakurikiranyweho ibyaha bya Jenoside yakorewe Abatutsi.

Ibi Meire yabyemereye mugenzi we, Jean Bosco Mutangana,umushinjacyaha Mukuru w’u Rwanda nyuma y’ibiganiro bagiranye kuri uyu wa kabiri tariki 05 Werurwe 2019.

Umushinjacyaha Mukuru w’u Rwanda Jean Bosco Mutangana yagize ati “Izi manza zaciwe ntabwo ari nyinshi, twashyizeho uburyo bwo kwihutisha amadosiye”.

Naho Phillippe Meire w’u Bubiligi wazanye n’itsinda rinini ry’abo bakorana, asobanura ko hakiri imbogamizi z’Abanyarwanda biyita impunzi za politiki ndetse n’abafashe ubwenegihugu bw’u Bubiligi, bityo ngo ibi bitumye inkiko zidakurikirana abaregwa Jenoside.

Nyuma y’uko aganira n’u Bushinjacyaha Bukuru bw’u Rwanda Meire yagize ati“Twiyemeje kugaba urugamba rutagira kubabarira kuko mu Bubiligi atari ubuhungiro bw’abakurikiranyweho gukora Jenoside”.

Ubusanzwe u Bubiligi bwari kuba bwoherereza u Rwanda abaregwa Jenoside, ariko nta masezerano yo kohererezanya abanyabyaha ibihugu byombi bifitanye.

Indi ngingo yizweho n’abashinjacyaha b’ibibihugu byombi yabaye iy’ikibazo cy’abapfobya n’abahakana Jenoside yakorewe abatutsi bari mu bubiligi aho bagifatiye umwanzuro w’uko kizagezwa mu nkiko vuba bishoboka.

Ubushinjacyaha Bukuru bw’u Bubiligi buvuga ko bugitegereje ko itegeko rikiri umushinga ritorwa n’Inteko Ishinga amateko yaho, kugira ngo butangire kugeza mu nkiko abapfobya n’abahakana Jenoside yakorewe Abatutsi.

Kuri ubu u Rwanda rufite impapuro 39 mu Bubiligi zo guta muri yombi abakurikiranyweho gukorera Jenoside Abatutsi mu mwaka wa 1994, ariko kugeza magingo aya inkiko zo muri icyo gihugu ngo zaciriye imanza abantu bagera ku umunani gusa.

Ubushinjacyaha Bukuru bw’u Rwanda bwemereye ubw’u Bubiligi kubona abatangabuhamya n’amakuru yose akenewe kuri buri muntu ukurikiranyweho ibyaha bya Jenoside, ndetse abakozi ku mpande zombi bakaba bagomba kuvugana no kugenderana.

Buvuga kandi ko bwatanze hirya no hino ku isi impapuro zirenga 1,000 mu bihugu 32, zo guta muri yombi abakurikiranyweho ibyaha bya Jenoside yakorewe Abatutsi mu 1994.

Muri abo, hari 19 boherejwe mu Rwanda na bimwe mu bihugu bari barahungiyemo, ndetse na batatu boherejwe n’Urukiko mpuzamahanga mpanabyaha rwashyiriweho u Rwanda.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru