Yashyizweho kuri7 December, 2018 | 08:39

Ibyatangajwe n’abo kwa Rwigara nyuma yo kugirwa abere ku byaha byose baregwaga

Nyuma y’uko Diane Rwigara ndetse n’umubyeyi we Adeline Rwigara babaye abere ku byaha byose baregwaga Diane Rwigara yahise avuga uko yakiriye umwanzuro w’urukiko n’icyo agiye gukora kirimo gukomeza ibyo yatangiye.Umubyeyi we ngo nawe agiye gukomeza gusenga Imana nk’uko ariwo murimo yiberamo.

Byari ibyishimo bikomeye mu rukiko ubwo umucamanza yatangazaga ko Diane Rwigara n’umubyeyi we Adeline Rwigara bagizwe abere.Mu rukiko humvikanye kwiyamirira mu byishimo bya benshi bari baje kumva imyanzuro y’Urukiko, abandi baririmba indirimbo z’Imana,

Nyuma y’iki cyemezo cy’urukiko Diane yavuze ko atunguwe ariko yishimye kandi ko agiye gukomeza urugendo yatangiye.

Ati"Nshimishijwe n’uko jye n’umubyeyi wannjye tugizwe abere. Sinari niteze ko ibi byaba. Birantunguye ariko biranshimishije. "

Akomeza agira ati“Ndakomeza ibyo natangiye,njyewe n’abandi, programme(gahunda) y’impinduka mu gihugu cyacu. Ngiye gukomeza.”

Ku rundi ruhande umubyeyi we Mukangemanyi Adeline wari ufite igitabo cya Bibiliya mu ntoki we yavuze ko atigeze ashidikanya ku bushobozi bw’Imana yemeza ko ariyo yamugize umwere.

Ati"Ntabwo nigeze mpangayika na gato kuko nari nzi ko iyo saha igeze Imana irategeka.Nari nzi ko Imana izaturenganura".

Mukangemanyi yakomeje avuga ko ashima Imana kuko iranganura ngo ari nabyo yavuze mu ntangiriro z’urubanza rwe n’umwana we.

Ati “Ndashima Imana cyane kuko abantu bararenganya ariko Imana irarenganura, nabivuze kuva bigitangira ko ari njye ari umwana wanjye nta dossier twari dufite, Imana rero irabigaragaje itwambitse imyenda yera ku mugaragaro.”

Yanavuze kandi ko ubu agiye kujya mu rugo agapfukamira Imana akayishima, hanyuma agakomeza imirimo yo kuvugira Imana dore ko ngo ariwo murimo asanzwe akora.

Diane Rwigara na nyina bafashwe kuva tariki 23 Ukwakira 2017 baregwa guteza imvururu cyangwa imidugararo muri rubanda bakwirakwiza ibihuha bigamije kwangisha abaturage ubutegetsi buriho.

Naho Diane Rwigara akiharira icyo gukora no gukoresha inyandiko mpimbano ubwo yashakaga kwiyamamariza kuyobora igihugu.

Umubyeyi we Mukangemanyi akiharira icyaha cy’ivangura no gukurura amacakubiri muri rubanda.

Yanditswe na Habarurema Djamali


Tanga igitecyerezo

Amazina
Ubutumwa

2 Comments

stranger one - 5 days ago

Imana Irabikoze abere baratashye ark mbafitiye impunenge! Ababantu naziriya mpanuka bitonde pe! Mbona iby’Ururwanda Atari saw a! Natwe twayobewe intego za leta iriho rwose! Gusa Imana izajya iturinda.

Tuyishime - 6 days ago

Nibyiza Gusa Bagakwiriye Kumenyako Ibyobakora Byose Kwirinda Biruta Kwivuza

Izindi nkuru