Yashyizweho kuri4 December, 2018 | 17:35

Gicumbi:Ubumenyi bucye ku mategeko butuma abaturage bahura n’ihohoterwa rishingiye ku gitsina

Bamwe mu batuye mu murenge wa Rutare,bavuga ko kutagira ubumenyi ku mategeko,bibakururira guhura n’ihohoterwa rishingiye ku gitsina,nyamara bagahitamo guceceka.

Mu kurushaho gusobanurira abaturage amategeko n’uburyo bwo guhangana n’ihohoterwa rishingiye ku gitsina,umuryango utegamiye kuri leta RCN Justice et democratie wahisemo gukoresha ubukangurambuga bunyujijwe mu ikinamico mu cyiswe ’umuriri w’ubutabera’ cyangwa "caravans juridique" mu rurimi rw’igifaransa.

Binyuze mu mukino w’ikinamico ugaragaza uburyo umugabo ahohotera umugore ndetse bigasa n’ibyahawe intebe,yewe nta n’ubumenyi mu mategeko amurengera asobanukiwe.Abaturage babifashijwemo n’abakinnyi bitorero mashirika,bavuga ko ari ishusho y’ubuzima benshi babayeho bw’ihohoterwa ndetse unacyebuye benshi mu bagabo.

Umwe mu baturage yagize ati”Ikinamico hari ibyo itweretse nk’ubuzima tubamo ndetse itwereka ko n’itegeko ko ririho cyane.Abenshi twiberagaho gutyo bikabaho gusa twibwira ko nta tegeko rihari.Ariko muri kiriya gika, iriya kinamico ibyo itweretse ni ubumenyi bujyanye n’itegeko dufite”.

Undi yagize ati”Ibi bintu rero mbona ko ari Imana yabikoze kugira ngo abantu bave mu bujiji.Bave hahandi habi aho ifaranga risanga za nshoreke umwana mu rugo ntabone umwenda,mitiweri ntiboneke ndetse ibintu byose bikabaho gutyo.Ariko ibi bintu byo gukubitwa kw’abagore bibaho cyane bagahora hasi kubera inkoni”.

Umukozi w’umuryango RCN Justice et Democratie ushinzwe ubukangurambaga Hitababyaye Jpierre,avuga ko umuriri w’ubutabera mu turere twa Burera na Gicumbi usize hari abaturage bumvise ko amategeko ahari kandi hari n’inzira zo kugana ubutabera .

Yagize ati”Hari ibibazo byagiye bibasha guhita bicyemuka nyuma y’umuriri n’ubutabera muri buriya bufasha bw’amategeko dutanga.Hari n’ibindi byahawe umuyobora kuko umuturage aza afite ikibazo, icyo aba bagize komite mpuzabikorwa y’ubutabera ku karere badashobora gucyemura bahita nibura bagiha umurongo bamubwira ngo uzakijyane mu rwego runaka kizacyemuka kandi nikidacyemuka uzajye aha naha kizacyemuka”.

Akomeza agira ati”Ubumenyi ni ikintu gikomeye cyane gishobora gukura abantu mu bwigunge.hari uwumvise message(ubutumwa)runaka,akaba wenda abona ntacyo yayimaza uyu munsi ariko ubwo bumenyi arabusigaranye.

Azi neza ko atemerewe guhohotera uwo bashanye ari umugore cyangwa umugabo kuko hari amategeko abihana mu gihe atari abizi yibwiraga ngo ni umuco,noneho akaba yabyirinda ni gihe yazashaka ntazapfe kubyitwaramo uko yishakiye”.

Si ugukurikira ikinamico gusa ,kuko abaturage bagira umwanya wo gutanga no gusobanuza ku bibazo bafite,dore ko mu bikorwa by’umuriri w’ubutabera habonekamo abakozi bafite aho bahuriye n’ubutabera bafasha abaturage mu ikemurwa no gutanga umurongo ku bibazo byagaragajwe .

Aha ni mu mukino w’ikinamico ugaragaza uburyo umugabo ahohotera umugore Mu bikorwa by’umuriri w’ubutabera habonekamo abakozi bafite aho bahuriye n’ubutabera bafasha abaturage gucyemura bimwe mu bibazo byagaragajwe

Gicumbi:Ishimwe Honore/MUHABURA.RW


Tanga igitecyerezo

Amazina
Ubutumwa

Izindi nkuru