Yashyizweho kuri29 July, 2019 | 16:01

Gasabo:Umukobwa yongeye gufatanwa amadorari ibihumbi 20 yari yahishe muri parafo y’akabare

Umukobwa uri mu kigero cy’imyaka 28 y’amavuko yafatanywe amadolari ibihumbi 20 mu kabari kitwa Kilimandjaro, gaherereye mu Murenge wa Gatsata mu Karere ka Gasabo.

kuri uyu wa Mbere tariki 29 Nyakanga 2019,umuvugizi wa Polisi mu Mujyi wa Kigali, CIP Umutesi Marie Gorette yabwiye itangazamakuru ko uwo mukobwa afungiye kuri sitasiyo ya Polisi ya Gatsata, hafi y’aho yafatiwe.

Ati “Yari atumye umumotari ngo ajye kumushakira umuntu umuvunjira, abibonye agira amakenga yibuka ko Polisi ihora isaba abantu kuba ijisho rya bagenzi babo, gutangira amakuru ku gihe, aza hano kuri sitasiyo ya polisi ya Gatsata, atanga amakuru.”

Nyuma yo kwakira ayo amakuru, Polisi yahise ikurikira uwo mumotari ajya kubereka aho uwo mukobwa ari mu kabari, abikanze ahita ahisha ya madolari muri purafo y’akabari, barasaka barayabona.

Gusa umukobwa ntiyabashije kuvugana n’itangazamakuru ariko yemeye icyaha anavuga ko yari asanzwe akora umwuga wo kuyarangura akayavungishamo amafaranga y’u Rwanda.

Ibi byemezwa na CIP Umutesi aho yavuze ko uyu mukobwa amaze amezi 6 afunguwe kubera icyaha nk’icyo.

CIP Umutesi ati “Ntabwo ari inshuro ya mbere, ni ubwa kabiri n’ubundi yari yarabifungiwe imyaka ibiri, hashize amezi atandatu avuye muri Gereza ya Nyarugenge iri i Mageragere.

CIP Umutesi yashimiye abagize uruhare mu gutanga amakuru ku gihe ariko anabwira abatekereza nk’uwo mukobwa ko ‘Basubiza amerwe mu isaho kuko inzego z’umutekano zifatanyije n’abaturage ziri maso kandi zitazihanganira inyangabirama’.

Mu gitabo cy’amategeko ahana ibyaha mu Rwanda, ingingo ya 269 iteganya ko ‘Umuntu uhindura, wigana cyangwa ukwirakwiza amafaranga y’amakorano ahanishwa igifungo kitari munsi y’imyaka itanu ariko kitarengeje imyaka irindwi’.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe