Yashyizweho kuri12 May, 2019 | 11:19

Gasabo:Umugabo yatawe muri yombi agerageza guha umupolisi ruswa y’ibihumbi bitanu(5000Frw)

Umugabo witwa Musangwa Donatien w’imyaka 33 yatawe muri yombi ubwo yageragezaga guha ruswa y’amafaranga ibihumbi bitanu (5000 frw) umupolisi kugira ngo areke imodoka ye yaramaze gusangana amakosa mu gihe cyo kuyisuzuma ubuziranenge.

Itabwa muri yombi rya Musangwa ryabaye kuri uyu wa gatanu nyuma y’uko yajyaga gusuzumisha ubuziranenge bw’imodoka ifite ibirango RAD 131 Z, maze imashini zisuzuma ibinyabiziga ziyisanganye amakosa yagombaga kujya gukoresha mu igaraje ahitamo gutanga ruswa.

Umuvugizi wa Polisi mu mujyi wa Kigali Chief Inspector of Police (CIP) Marie Gorette Umutesi yatangaje ko Musangwa Donatien yafashwe ubwo yaraje gusuzumisha ubuziranenge bw’imodoka ye icyuma kizisuzuma cyikayisangana ibibazo agahita ashaka gutanga ruswa ngo bayihe ibyangombwa byemeza ko ari nzima kandi ifite inenge.

Yagize atiImodoka yari yazanye gusuzumisha ubuzirangenge icyuma cyayisanganye ibibazo by’amapine, bamubwira ko agomba kubanza kujya kuyakoresha, nibwo yashatse gutanga ruswa kugira ngo isonerwe ijye ku murongo w’ izitegereje guhabwa ibyangombwa by’ubuziranenge kandi yo ifite inenge."

CIP Umutesi yibukije abaturage ko ruswa igira ingaruka mbi kuri serivisi inoze n’iterambere ry’igihugu, ko buri wese agomba kuba umufatanyabikorwa mu kuyirwanya.

Yasabye abaturage gufatanya n’inzego zishinzwe umutekano n’uzubutabera kuyirwanya, abagize aho bayibona bagatanga amakuru bahamagara ku nimero itishyuzwa 997 .

Akomeza agira inama abatunze ibinyabiziga kwirinda kubitwara bazi ko bifite ibibazo kuko ariho hakunze guturuka impanuka zo mu muhanda.

Ati "Hari abakora amakosa yo gutwara ibinyabizi bifite ibibazo rimwe na rimwe bakagira ngo bari kwigirira neza, birengagije ko ibyo bibazo ari intandaro z’impanuka zihitana abantu, zikangiza n’ibikorwaremezo. Niba imodoka ibonetseho inenge, ihute uyikoreshe bitume ugenda wizeye umutekano w’imodoka yawe."

Musangwa Donatien yashyikirijwe Urwego rw’Igihugu rw’Ubugenzacyaha (RIB) Sitasiyo ya Remera kugira ngo hatangire iperereza ku cyaha acyekwaho.

Itegeko rihana ruswa mu ngingo yaryo ya 4 riteganya ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Ingingo ya 300 y’Igitabo cy’amategeko ahana ibyaha mu Rwanda ivuga ko umuntu wese ukora ubujura budakoreshejwe kiboko cyangwa ibikangisho ahanishwa igifungo kuva ku mezi atandatu (6) kugeza ku myaka ibiri (2) n’ihazabu y’amafaranga y’u Rwanda yikubye inshuro kuva kuri ebyiri (2) kugeza kuri eshanu (5) z’agaciro k’icyibwe cyangwa kimwe gusa muri ibyo bihano.

Soma inkuru bifitanye isano:Kigali:Umugabo yatawe muri yombi nyuma yo kwihugikana umupolisi ngo amuhe ruswa
Chief Editor/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru