Yashyizweho kuri24 September, 2018 | 10:33

Diane Rwigara na nyina Mukangemanyi bihannye umucamanza bituma urubanza rusubikwa

Kuri uyu munsi byari biteganyijwe ko Diane Rwigara na nyina biregura ku byaha barezwe n’Ubushinjacyaha mu iburanisha riheruka. Ariko bageze mu Rukiko Rukuru muri iki gitondo basaba kuburana ifungwa n’ifungurwa ry’agateganyo,maze bahita bihana umucamanza umwe mu bari bagiye kuburanisha.

Ibi kandi nyuma y’iburanisha ryabaye tariki 24 Nyakanga 2018 aho umushinjacyaha yagiye mu mizi y’ibyaha abashinja birimo: guteza imidugararo muri rubanda no gukwirakwiza ibihuha bigamije kwangisha abaturage ubutegetsi buriho, uyu munsi rero uruhande rw’abaregwa rwagombaga kubyireguraho.

Nshimiyimana Diane Rwigara na nyina Adeline Mukangemanyi bari baje kuburana bari kumwe n’abunganizi babo; Me Buhuru Pierre Celestin wunganira Diane na Me Gatera Gashabana wunganira Adeline.

Nk’uko babyemererwa n’amategeko, ngo ku wa gatanu bandikiye Urukiko ko bashaka kuburana ifungwa n’ifungurwa ry’agateganyo, bifuza gukurikiranwa badafunze.

Muri iki gitondo mu rukiko bamaze kubimenyesha, abunganizi b’abaregwa bahise bavuga ko bihannye umwe mu bacamanza bari bagiye kuburanisha iri funga n’ifungurwa ry’agateganyo kuko ngo yanariburanishije muri uru rubanza mu bihe byashize.

Urukiko rwavuze ko ibaruwa yabo isaba kubura ifunga n’ifungurwa ry’agateganyo yageze ku rukiko kuwa gatanu amasaha y’akazi yarenze bityo batabonye umwanya wo kwiga ku bacamanza baburanisha urubanza uyu munsi.

Kubera iyi mpamvu yo kwanga umwe mu bacamanza,Perezida w’Urukiko yahise avuga ko uru rubanza rusubitswe, Urukiko rukazagena igihe ruzasubukurirwa.

Yanditswe na Habarurema Djamali


Tanga igitecyerezo

Amazina
Ubutumwa

1 Comment

Tuyishime Ivan - 3 weeks ago

sinshyigira ibyakozwe numucamanza kandi nange kuba ntambaraga mfite birambabaza cyane icyo bakoze nigikorwa cyiri Paferct kbx tubarinyuma

Izindi nkuru