Yashyizweho kuri13 June, 2019 | 14:27

Col Byabagamba na Rusagara bongeye kugaragara mu rukiko, gusa Kabayiza yasusumiraga kwihagurutsa ari ikibazo

Kuri uyu wa Kane nibwo Col. Tom Byabagamba,Brig. Gen. (rtd) Frank Rusagara na Sgt (rtd) Kabayiza François bagarutse imbere y’urukiko mu bujurire bamwe basaba ko hakurikizwa Mandela Rules bityo bakarekurwa nyuma y’ibihano bakatiwe muri 2016.

Mu masaha ya Saa 8h40 nibwo Col Tom Byabagamba na Rtd BrigGen Frank Rusagara binjiye mu cyumba cy’Urukiko, Rtd Sgt Kabayiza Francois we yinjiye asusumira afatiriwe n’abasirikare mu maboko kuko atabashaga kwigenza.

Ubushize aba bagabo uko ari batatu baburana,hanzuwe ko umucamanza azajya kugenzura uburyo bafunzwemo ari nako bihabwa agaciro birakorwa.Ariko umucamanza yavuze ko ibyo babonye bitari butangazwe mu ruhame kuko byashyizwe mu ikoranabuhanga ry’inkiko no muri dosiye bikazagarukwaho mu myanzuro y’urubanza.

Me Buhuru wunganira BrigGen Frank Rusagara yabwiye inteko iburanisha ko ahereye kuwo yunganira ibyo babwiye Urukiko ko afunze nabi ko nabo babyiboneye, ko afungiye mu kato kandi akikijwe na zakamera impande zose.

Me Buhuru yabwiye umucamanza ko ishami rya Gereza ryemewa n’iteka rya Minisitiri, ariko ngo nk’iyo Rusagara agiye kwivuza ku muganga we, n’ushinzwe kumurinda aragenda akacira ku muryango w’icyumba afungiyemo, ndetse ngo byemejwe na Dr Boringo Joseph.

Me Buhuru ati “Nk’uko mwabibonye twe twabifashe nk’iyica rubozo umukiliya wange akorerwa.”

Ikindi kandi ngo n’iyo yagiye kureba Uwo yunganira bamwumviriza kandi bitemewe.

Urukiko rwahise rubaza Me Buhuru kugira icyo avuga kuri ibyo babonye, niba basaba ko byakosorwa cyangwa uwo yunganira akarekurwa by’agateganyo, Me Buhuru avuga ko bifuza ko bafungurwa by’agateganyo bagakurikiranwa badafunze.

Ako kanya Rusagara nawe yahise asaba ijambo abwira Urukiko ko yahagarikiwe buri kimwe cyose yemererwa n’amategeko, nk’ubwisungane mu kwivuza bwa MMI aho yasobanuye ko asagaye yivuza akoresheje amafaranga y’umuryango we umwoherereza.Ikindi ngo yahagarikiwe amafaranga yizigamiye akiri mu kazi bityo ngo kubera uburwayi afite akorerwa massage yonyine kandi bakayikora umusirikare amuhagaze hejuru.

Yabonyeho gusaba Umucamanza kumufasha agasubirana uburenganzira bwe, akanasubizwa ibyo yemererwa n’amategeko.

Ku ruhande rw’Ubushinjacyaha nabwo bwahawe umwanya buvuga ko icyahagurukije urukiko bitari ukureba ko Rusagara adahembwa cyangwa se ko adahabwa iyo MMI avuga.

Bwavuze kandi ko bwahagaritse ugusurwa kuri Col Byabagamba kubera impapuro zafashwe zari zimwohorerejwe na Dr David Himbara Mukuru we urwanya ubutegetsi bw’u Rwanda).

Col Byabagamba uretse kuba afunzwe nabi, n’ubwisungane bwa MMI ni ikibazo

Col Byabagamba nawe yahawe umwanya atangira ashima inteko y’Abacamanza yagize amatsiko yo kureba aho afungiye, gusa atangira abaza impamvu yahagarikiwe ubwishingizi bwo kwivuza nka mugenzi we Rusagara.Ahita aboneraho no kubwira Umucamanza ko igihe azasubirizwa uburenganzira bwo kwivuriza muri MMI, bizafasha n’abandi basirikare bafungwa bambuwe kuyivurizaho.

Kuri iki kibazo cyo guharikirwa kwivuza Byabagamba yavuze ko umuyobozi wa Military Police yasobanuye ko iyo ugiye mu rukiko rwa gisirikare mu rwego rw’ibanze hari igice cy’umushahara bakata, wajya mu rw’ibanze bakawuhagarika.

Yavuze ko nubwo ikibazo uyu munsi ari we kireba kuko yakimenye ageze kwa muganga i Kanombe agasanga atacyemerewe kwivuriza kuri MMI (ubwishingizi bwa gisirikare), urukiko rwagisuzuma mu buryo bugari.

Ngo yasabye ko yakwemererwa kujya gushaka ubundi bwishingizi ariko ntiyabyemererwa cyangwa ngo abyangirwe. Ibyo ngo ntibyari bikwiye kuko iyo umuntu akiburana mu nkiko aba agifatwa nk’umwere.

Yanasobanuye ko afunzwe nabi, ashingira ku mategeko yemejwe n’Umuryango w’Abibumbye yiswe ’Nelson Mandela Rules’, asobanura ko byemezwa ko umuntu afunzwe wenyine iyo amaze amasaha 22 nta muntu baganiriye, ndetse ko umuntu iyo birenze iminsi 15 bifatwa nk’akato k’igihe kirekire.

Yavuze ko mu ngingo ya 43 y’iryo tegeko, ivuga ko iyo umufungwa akoze icyaha, mu bihano yahabwa hatagomba kubamo kubuzwa guhura n’umuryango we. Mu gihe yari agisobanura, umucamanza yasabye ko haba akaruhuko k’iminota itatu, Byabagamba we ati ’reka mbahe itanu’.

Ubwo iburanisha ryakomezaga, Col Byabagamba yavuze ko Umushinjacyaha yavuze ko bamuhagarikiye gusurwa kubera imyitwarire ye, nyamara ngo mu bihano yahabwa ntabwo hateganywamo kubuzwa guhura n’umuryango we.

Yavuze ko bitewe n’uburyo afunzwemo, icyabihagarika ari uko urukiko rwategeka ko afungurwa by’agateganyo.

Yashimangiye ko Mandela Rules ibuza gufunga umuntu wenyine igihe afite ikibazo cy’ubuzima gishobora gukomera bitewe n’uburyo afunzwemo. Ati "Ibyo bihuye neza n’ikibazo cyanjye nk’uko nakibagaragarije."

Me Gakunzi Valery wunganira Col. Tom Byabagamba, yavuze ko ibyo bagarukaho bishimangira inzitizi zatumye basaba ko uwo yunganira arekurwa by’agateganyo mu gihe bategereje kuburana mu mizi urubanza mu bujurire.

Yavuze ko ibijyanye n’akato bagaragaje ko Col. Byabagamba afungiwemo, ko uburyo abantu bafungwamo bitagenwa n’abayobozi ba za gereza ku basivili cyangwa ‘Military Police’ ku basirikare, ahubwo bigengwa n’amategeko, ku buryo bidakwiye ko ubushinjacyaha buvuga ko uburyo abantu bafungwamo byarekerwa gereza.

Yavuze ko gufungwa atari ukwamburwa umudendezo gusa, ahubwo hiyongeraho gufungirwa ahantu hazwi, mu buryo buteganywa n’amategeko.

Yabwiye abacamanza ko icyo ubushinjacyaha bwa gisirikare bwita gereza ya Mulindi atari gereza kuko Col. Byabagamba afungiwe i Kanombe mu kigo cya gisirikare, nubwo Umuyobozi wa Military Police yasobanuye ko ari gereza ya Mulindi yaguriwe i Kanombe.

Ariko Me Gakunzi yavuze ko ntaho iyo gereza iri i Kanombe igaragara mu igazeti ya leta kandi yakunze kubigaragariza abacamanza. Ibyo ngo bivuze ko nubwo umucamanza yategeka ko arekurwa by’agateganyo, bitazakuraho amateka ko yamaze imyaka itanu afungiwe ahantu hatemewe.

Yavuze ko nubwo iyo gereza y’i Kanombe yaba yemewe, bitavanaho ko Col. Byabagamba afunzwe wenyine, ndetse ko imiryango yari ihari mbere y’uko ahafungirwa yazibwe ngo hatagira umuntu bahura.

Yavuze ko ibyo Military Police yasobanuye ko guhindura ahantu bafungiwe byatewe n’urwego bariho, nta rwego na rumwe rushobora gutuma umufungwa ahura n’undi, kandi ku Mulindi hari aba-colonel bahafungiwe baburana imanza mu nkiko za gisirikare.

Yavuze ko Col. Byabagamba arwaye umugongo ndetse ko kugira ngo abashe kwivuza ari uko yarekurwa, kuko no kugira ngo abashe guhagarara imbere y’inteko iburanisha ni uko yambaye umukandara, cyane ko yanabagiwe muri Afurika y’Epfo kandi bizwi.

Me Gakunzi yavuze ko kuba Col Byabagamba arwaye ariko akaba yarahagarikiwe ubwishingizi bw’indwara kandi urubanza yakatiwe rutaraba ndakuka na byo bikwiye gukurikiranwa bijyanye n’uburenganzira bwe.

Yavuze ko abana n’umugore wa Byabagamba badaheruka kumusura, kandi ibyo byakurwaho gusa no kumwemerera kurekurwa by’agateganyo.

Yagarutse kuri Mandela Rules, ku ijambo Nelson Mandela yavuze ubwo bayitoraga, ko igihugu kimeze neza kitareberwa gusa ku buryo gifata abaturage bacyo bari hanze, ahubwo binareberwa no ku buryo gifata imfungwa zacyo. Ibyo nabyo akabishingiraho asaba ko uwo yunganira arekurwa by’agateganyo.

Mu gusoza, Byabagamba yongeyeho ko hari n’ikibazo cyo kuba ubushinjacyaha bwaramureze ko hari inyandiko zafashwe zimushyiriwe muri gereza, bukazishyikiriza urukiko kandi we atazi ikirimo, asaba ko yabimenyeshwa.

Ubushinjacyaha buhawe umwanya bwatangiye bwibaza niba biramutse binagaragaye ko umuntu afunzwe nabi cyangwa adasurwa, igisubizo cyaba kurekurwa by’agateganyo nk’uko abaregwa babisaba, cyangwa ari ugukosora ibitameze neza.

Yavuze ko bafunzwe mu buryo bwemewe kuko bafunzwe ku itegeko ry’umucamanza kandi bafungiwe ahantu hazwi.

Umushinjacyaha yavuze ko ku bijyanye no gusurwa nta kibazo gihari kuko Me Gakunzi yemererwa kubonana n’uwo yunganira, ndetse ngo n’umugore we aramusura kandi na Byabagamba ubwe abyemera.

Sgt Kabayiza kwigenza ni ikibazo.

Sgt Kabayiza wagaragaye mu rukiko arwaye, asusumira ku buryo no guhaguruka bisaba kumusindagiza, umwanya munini wahawe umwunganizi we Me Nkuba Milton. Umucamanza yabajije Kabayiza impamvu aburana yicaye, amusubiza ko yabwiye Urukiko kenshi ko arwaye ndetse ko yinjiye mu Rukiko acigatiwe n’abashinzwe kumurinda.

Umucamanza ahita avuga ko iyo babona ko adashoboye kuvuga bari kugaragaza ko akeneye kwivuza, ntagere imbere y’urukiko.

Kabayiza yavuze ko nk’uko urukiko rwabonye aho aryama, umuganga aheruka kumubwira ko umuvuduko w’amaraso uri hejuru cyane ku buryo yamusabye ko ajyanwa kwa muganga ariko ntarabasha kuvurwa.

Yavuze ko asaba kurekurwa by’agateganyo kuko arwaye bikomeye, cyane ko atigeze abura abamuvura ahubwo yabuze abamwitaho, kandi ubuzima bwe ari bwo butunzi bwonyine afite.

Me Nkuba yavuze ko urukiko rwiboneye uko Kabayiza ameze haba igihe rwajyaga kuri gereza n’igihe yitabaga urukiko uyu munsi, rukwiye guha amabwiriza ‘Military Police’, Kabayiza akavuzwa.

Yavuze ko basaba ko Kabayiza arekurwa by’agateganyo kubera ko afite uburwayi bumukomereye, nyamara we afungiwe mu rusange rw’abandi bantu benshi kandi afite n’ibindi bibazo by’ubuzima. Noneho kuba afungiwe i Kanombe, Me Nkuba yavuze ko ari kasho kuko nta kigaragaza ko ari ikindi gice cya gereza ya gisirikare yo ku Mulindi.

Yavuze ko n’iyo agize umwanya wo kubonana na muganga, umusirikare wa Military Police aba ahari ku buryo atabona uko aganira neza na muganga we. Ikindi ngo ni uko yemerewe ibitaro, ariko ntiyigeze abihabwa kugira ngo afashwe neza uko bikwiye.

Me Nkuba yanibajije niba Rusagara na Byabagamba barajyanywe i Kabombe kubera urwego rwabo, yibaza Kabayiza we icyabiteye.

Umushinjacyaha yavuze ko Kabayiza yajyanywe gufungirwa i Kanombe kugira ngo yegere abaganga kuko umuganga uhaba ari na we ukuriye abo ku Mulindi, kandi ngo niba bifuza ko asubizwa ku Mulindi ari "nk’isegonda imwe."

Ku bijyanye n’impapuro umushinjacyaha yahaye urukiko, yasobanuye ko ari uko umucamanza yamenyeshejwe ko hari impapuro zafashwe zishyiriwe Byabagamba maze yibaza niba zihari, akaba yashakaga kumwereka ko zihari ariko atazitangaho ikirego.

Kuri izo mpapuro kandi Col. Byabagamba yavuze ko na we akwiye kumenyeshwa ibizirimo kuko nta zo azi kandi ari mu gihano gikomoka kuri zo.

Biteganyijwe ko kuri tariki 21 Kamena 2019 aribwo icyemezo cy’urukiko ku nzitizi abaregwa bagaragaje z’uburyo bafunzwemo kizasomwa.

JPEG - 49.6 kb
Brig.Gen Rusagara asohoka mu modoka mbere yo kwinjira mu rukiko

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe