Yashyizweho kuri14 May, 2018 | 11:22

Amajyepfo : Babiri bakora mu Ntara bafungiye gukwirakwiza Inyandiko zangisha abaturage Leta

Abakozi babiri b’Intara y’Amajyepfo batawe muri yombi bakurikiranyweho kugira uruhare mu nyandiko zitagira umukono zizwi nka ‘Tract’ zatoraguwe mu biro by’umukozi wayo ushinzwe igenamigambi n’ingengo y’imari.

Ku wa Gatanu w’icyumweru gishize nibwo mu biro by’umukozi w’Intara y’Amajyepfo ushinzwe igenamigambi n’ingengo y’imari hatoraguwe ‘Tract’ zanditseho amagambo agamije kwangisha abaturage Leta.

Nyuma y’uko zitoraguwe, uwo mukozi n’abandi bakorera muri ibyo biro (bose hamwe batanu) bahise batabwa muri yombi mu rwego rwo gukora iperereza.
Umuvugizi w’Urwego rw’Ubugenzacyaha ‘Rwanda Investigation Bureau’ Modesta Mbabazi, yabwiye umunyamakuru ko izo nyandiko zari zanditseho amagambo agamije kwangisha abaturage Leta.

Yagize ati “Ni Tract ikwirakwiza ibihuha ku mwanzi w’igihugu, bagamije kwangisha abaturage Leta. Zabonetse mu biro by’Umuyobozi ushinzwe igenamigambi n’ingengo y’imari mu Ntara y’Amajyepfo, aho akorera n’abandi ku wa Gatanu. Uko bakorera muri ibyo biro bose bari bafashwe ari batanu ariko uyu munsi, harakurikiranwa babiri muri bo.”

Yavuze ko abandi barekuwe, hasigaye Umuyobozi ushinzwe igenamigambi n’ingengo y’imari mu Ntara y’Amajyepfo, Faustin Mutambuka n’umutekinisiye wayo witwa Mutuyimana Olivier.

Mbabazi yavuze ko icyaha bakurikiranyweho kijyanye n’ingingo ya 463 mu gitabo cy’amategeko ahana y’u Rwanda cyo ‘guteza imvururu cyangwa imidugararo muri rubanda’

Iyo ngingo iti “umuntu wese, witwaza, ari disikuru avugiye mu nama cyangwa mu giterane, ari inyandiko ubwoko bwose, amashusho cyangwa ibimenyetso by’amoko yose, bimanitswe, bitanzwe, biguzwe cyangwa bigurishijwe cyangwa bishyizwe mu maso ya rubanda, uwamamaza nkana ibihuha akagomesha cyangwa akagerageza kugomesha rubanda arwangisha ubutegetsi buriho, agatera cyangwa akagerageza guteza imvururu mu baturage ashaka ko basubiranamo, agatera rubanda intugunda ashaka kubyutsa imidugararo muri Repubulika y’u Rwanda, ahanishwa igifungo kuva ku myaka icumi kugeza ku myaka cumi n’itanu.”

Chief editor


Tanga igitecyerezo

Amazina
Ubutumwa

Izindi nkuru