Yashyizweho kuri24 July, 2019 | 12:05

Sgt Kabayiza yiyamye umucamanza uri mubari kuburanisha urubanza rwe na Col Byabagamba na Rusagara

Sgt (rtd) Kabayiza François na bagenzi be Col Tom Byabagamba wigeze kuyobora Umutwe wa Gisirikare urinda abayobozi bakuru na Brig Gen (rtd) Frank Rusagara bitabye Urukiko Rukuru, yihana umucamanza bituma isomwa ry’urubanza risubikwa.

Mu iburanisha ryo kuri uyu wa Gatatu tariki 24 Nyakanga 2019 ubwo abo bagabo bari bitabye Urukiko Rukuru ngo hasuzumwe ubusabe bwabo ku ifungurwa ry’agateganyo, Kabayiza yihannye umwe mu bacamanza wari mu Nteko yari igiye kubusuzuma bituma urubanza rusubikwa.

Kabayiza yihannye umucamanza witwa Mukanyundo Patricie, avuga ko afite ikibazo cy’uburwayi ariko ngo akabyirengagiza, ntagire umwanzuro abifataho.

Ubwo yinjiraga mu cyumba cy’iburanisha, Kabayiza yahise avuga ko atari buburane kuko atizeye ubutabera azahabwa mu ifatwa ry’imyanzuro mu gihe impamvu z’uburwayi yagaragaje zateshejwe agaciro.

Umwunganizi we mu mategeko yavuze ko ushinjwa iyo yihannye umucamanza, urubanza ruhita rusubikwa nta mpaka, hanyuma hagategurwa izindi ngingo zizagenderwaho mu rindi buranisha.

Yagaragaje ko ari uburenganzira bw’uwo yunganira kuba yakwanga umucamanza bitewe n’uko amubona.

Ubushinjacyaha bwavuze ko ibyo Kabayiza avuga nta shingiro, ahubwo ari uburyo bwo gutinza urubanza, gusa agaragaza ko atazi ikindi kibyihishe inyuma kuko uburyo yagombaga kuvuzwa ari ubusanzwe, nta mwihariko yari akwiye.

Kugeza ubu inteko iburanisha ntiremeza neza igihe nyacyo isomwa ry’urubanza rw’aba bagabo rizabera.

Abo bagabo bafashwe mu 2014 bakekwaho ibyaha bitandukanye bifite aho bihuriye no kwangisha rubanda ubutegetsi.

Muri Werurwe 2016, Col Byabagamba yakatiwe gufungwa imyaka 21 no kwamburwa impeta zose za gisirikare; Rtd Brig Gen Frank Rusagara yahanishijwe gufungwa imyaka 20 mu gihe Rtd Sgt Kabayiza François we yahanishijwe igifungo cy’imyaka itanu n’ihazabu y’ibihumbi 500 Frw.

Mu ntangiriro z’umwaka wa 2019 nibwo bajuririye icyemezo cyo gufungwa ndetse muri Werurwe urukiko rwatangiye gusuzuma ubusabe bwabo ku ifungurwa ry’agateganyo.

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe