Yashyizweho kuri12 May, 2019 | 14:47

Kigali:Umushoferi yamennye ibanga ry’abagabo batatu bari batwaye udupfunyika 8000 tw’urumogi barafatwa

Ku bufatanye n’umushoferi wa Taxi voiture watanze amakuru, Polisi ikorera mu karere ka Gasabo yataye muri yombi abagabo batatu bakekwaho gucuruza ibiyobyabwenge, bari bafite udupfunyika 8000 tw’urumogi bari bavanye muri Repubulika Iharanira Demokarasi ya Congo.

Aba bagabo bafashwe mu gicuku gishyira kuri iki Cyumweru, ubwo umushoferi wari ubavanye i Rusororo abajyanye ku Kimisagara, yagiraga amakenga kubera uko bagendaga iryo joro ndetse yumva n’umwuka w’urumogi.

Abo bagabo batawe muri yombi nyuma y’aho umushoferi wari ubatwaye yahagaritse imodoka kuri Polisi ikorera munsi y’inyubako ya Kigali Convention.Ubwo bahitata bafungirwa kuri Sitasiyo ya Polisi ya Kimihurura.

Umwe muri bo w’imyaka 57 usanzwe aba Kimisagara yabwiye umunyamakuru ko yahuye n’uwari uvuye muri RDC, akamubwira ko afite urumogi bakumvikana gushaka isoko mu Rwanda niko kurupakiza bakaruzana Rusororo aho baje guhamagara umushoferi wa Taxi Voiture ngo abahavane bikarangira batawe muri yombi.

Yavuze ko urwo rumogi yari yaramaze kubona isoko ryarwo mu Karere ka Nyanza aho yagombaga kurugurisha.

Ati “Uru rumogi ngereranyije rwari rufite nk’agaciro ka miliyoni imwe n’ibihumbi 800 Frw. Hari umuntu wari wanshatseho isoko w’i Nyanza. Turabizi ko gucuruza urumogi ari icyaha ariko nabikoze kubera ubuzima bushaririye, nibwo bwa mbere nari mbikoze iyo mba nsanzwe mbikora simba narafashwe kuko nari gukorana n’umumotari tuziranye.”

Umugabo ukomoka muri RDC wazanye urwo rumogi mu Rwanda yavuze ko umwe muri bagenzi be bamenyanye nyuma akaza kumuhamagara amubaza niba yabona urumogi, undi akamubwira ko agiye kurushaka bikarangira baje kurucuruza mu Rwanda.

Ati “Yigeze kumpamagara arambaza ati ‘aho haboneka urumogi?’ Mubwira ko nzamubariza, nyuma ampamagaye numva hari uwo yavuganye nawe arambwira ngo ibintu byarabonetse. Arambwira ati ‘wowe uzaruzane n’urugeza aha nzaguha amafaranga uyajyane aho warukuye.

Yakomeje avuga ko bavanye i Rubavu bagera i Kigali umushoferi akabaparika kuri Polisi yo mu muhanda Kimihurura akavuga ngo ‘aba bantu nihagira usohoka mumurase batwaye ibintu bitemewe.’

Undi mugabo bafatanwe we yavuze ko yaguye mu mutego atazi kuko yahawe rifuti muri iyi modoka yari itwawemo urumogi akaza kwisanga yatawe muri yombi.

Ati “Twari dusanzwe tubana mu nzu imwe ariko nari nsanzwe muzi mu bucuruzi bw’ibitoki. Yarampamagaye ngo muzanire amafaranga ibihumbi 180 Frw ariko nari nziko agiye kwishyura bya bitoki nk’uko asanzwe abikora. Nyamugezaho nari mfite mama urwaye mbasaba ko bantwara kuko berekezaga mu cyerekezo kimwe n’icy’aho nari ngiye, ngezeyo nsanga umubyeyi wanjye bamujyanye kwa muganga ndongera ndababaza nti muri he ngo tujyane, baraza barantwara namenye ibyo batwaye mbonye turi kuri polisi.”

Yabwiye itangazamakuru ko yari amaze umwaka babana n’uwamutumye amafaranga. Avuga ko ubusanzwe afite urugo mu Ruhango ariko akaba yarabanaga n’uyu mugabo kubera ko afite akazi muri Kigali.

Aba bagabo bombi bemeza ko ari ubwa mbere bari bagiye mu bikorwa byo gucuruza ibiyobyabwenge, ndetse bagatakamba basaba kugirirwa ibambe.

Umushoferi wabashyikirije Polisi yavuze ko bamuhamagaye yibereye mu Biryogo i Nyamirambo, akabasanga Nyabugogo bakamubwira ko hari urumogi bagiye gufata ahitwa 15, bavugana 50 000 Frw ariko bamuha 10 000 Frw yo kunywa lisansi mu gihe andi bari kuyamuha bageze Kimisagara aho berekezaga.

Ati “Numvise ko ari ibiyobyabwenge ndavuga nti ‘aho kugira ngo aba bantu bajye kwica abana b’abanyarwanda reka ngende mbipakire ningera ahantu hari abapolisi mpite mbigaragaza’, niko kubitwara nagera kuri Polisi kuri Convention Centre mpita mbibwira Polisi.”

Umuvugizi wa Polisi mu Mujyi wa Kigali, CIP Umutesi Marie Gorette, yashimye umushoferi wakoze ibishoboka byose aba bagabo bagashyikirizwa Polisi.

Yagize ati “Uwo mugabo wo muri Congo yafashe imodoka y’Umutanzaniya aza mu Rwanda bagera Rusororo baramwishyura arigendera. Nyuma baje kuvugana n’Umunyarwanda utwara Taxi Voiture arabatwara ariko aza kubashyikiriza Polisi avuga ko batwaye ibintu bitemewe.”

Mu butumwa bwe, CIP Umutesi yabwiye abaturage gukomeza kugira amakenga no kudahishira abatwaye ibiyobyabwenge kuko byangiza kandi bikagira ingaruka nyinshi mbi kuwakinyweye.

Ati “Abaturage bakomeze batange amakuru kugira ngo ibi bintu bicike, kandi nongera kubabwira ko n’ibihano byiyongereye ubu biremereye bakwiye kubireka kugira batagongana n’itegeko bagahanwa.”

Igitabo cy’amategeko ahana ibyaha mu Rwanda giteganya umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihamijwe n’urukiko ahanishwa igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda atari munsi ya miliyoni eshanu ariko atageze kuri miliyoni icumi ku byerekeye ibiyobyabwenge byoroheje.

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru