Yashyizweho kuri18 December, 2016 | 13:16

UR mu biganiro n’abafatanyabikorwa ngo bakemure ikibazo cya Stage gihangayikishije benshi

Nyuma y’igihe abanyeshuri bo muri Kaminuza y’u Rwanda cyane abari kwimenyereza umwuga (stage) bataka ibibazo baterwa no kuba amafaranga bahabwaga agenewe iki gikorwa yarahagaritswe, kuri ubu ubuyobozi bw’iyi kaminuza buratangaza ko iri mu biganiro n’abafatanyabikorwa mu burezi bigamije kurangiza iki kibazo.

Kuva uyu mwaka w’amashuri watangira, abanyeshuri batari bake bari kwimenyereza umwuga mu bice binyuranye, bakunze kumvikana bataka imibereho mibi bavuga ko iterwa no kuba badahabwa amafaranga yagenewe kwimenyereza umwuga azwi nk’aya stage.

Ibi bituma bamwe mu banyeshuri bishakamo ubushobozi kugira ngo babashe kwibeshaho, bishyura icumbi, ibyo kurya, amafaranga y’ingendo z’aho bakorera n’ibindi, byose bemeza ko bibagora cyane.

Umwe muri abo banyeshuri wiga muri Kaminuza y’u Rwanda ishami ry’Uburezi waganiriye na The New Times, yagize ati “Naturutse mu muryango ukennye, nigira ku nkunga ya leta. Igihe najyaga kwimenyereza umwuga (stage), byarangoye cyane kwishyura icumbi mu Karere ka Gicumbi nyuma y’uko bahagaritse amafaranga ibihumbi 30 bya stage baduhaga.”

Umuyobozi wungirije wa Kaminuza y’u Rwanda ushinzwe imari n’ubutegetsi, Prudence Rubingisa, yavuze ko bahisemo guhagarika aya mafaranga bitewe n’ubushobozi bwa kaminuza butari buhagije.

Ati "Ayo mafaranga yaturukaga mu bushobozi bwa kaminuza,bitari mu ngengo y’imari ya leta. Twahagaritse ayo mafaranga bitewe n’uko ubushobozi bwacu n’abo twishyura bitajyanye.”

Yakomeje agira ati “Turi mu biganiro na Minisiteri y’Uburezi, REB na Banki Itsura Amajyambere (BRD) kugira ngo dushakire hamwe ubundi buryo twakwishyura ayo mafaranga binyuze mu nguzanyo baha abanyeshuri (amafaranga bita aya bourse).”

Rubingisa kandi avuga ko akazi gakorwa n’abanyeshuri baba bimenyereza umwuga gakwiye kujya gahabwa agaciro mu mafaranga ku buryo ibigo bakorera byajya bibaha amafaranga abafasha.

Avuga kandi ko bagiye kwicarana n’ibigo binyuranye birimo amabanki, inganda, ibitaro, amashuri ibigo n’amakompanyi atandukanye, kugira ngo barebere hamwe uko bafatanya mu gukemura iki kibazo.

Mu minsi ishize ubwo yaganiraga na Sena, bamwe mu basenateri bagatanga icyifuzo cy’uko amafaranga ibihumbi 25 ahabwa umunyeshuri nk’ayamufasha yakongerwa, Minisitiri w’Uburezi, Dr Musafiri, yavuze ko abantu 40% by’aba bayasabye ari bo bonyine bayabona abandi 60% ntibayabone kandi na bo baba bemerewe kujya kwiga muri kaminuza, ahanini bitewe n’ubushobozi buke.

Kaminuza y’u Rwanda ifite abanyeshuri ibihumbi 32 biga mu makoleji yayo atandatu, aho muri bo ibihumbi 23 bahabwa inguzanyo ibafasha kwiga no kubatunga mu gihe cy’amasomo.

Yanditswe na Ubwanditsi/MUHABURA.rw


Tanga igitecyerezo

Amazina
Ubutumwa

Izindi nkuru