Yashyizweho kuri14 December, 2018 | 16:27

Perezida Kagame yasabye abaminisitiri 3 na Guverineri wa Banki Nkuru ngo bisobanure ku macenga ari hagati ya SACCO na VUP

Perezida Kagame yasabye ko Minisitiri w’Intebe, Dr Edouard Ngirente; Minisitiri w’Ubutegetsi bw’Igihugu, Prof Shyaka Anastase; Minisitiri w’Imari n’Igenamigambi, Dr Uzziel Ndagijimana na Guverineri wa Banki Nkuru y’Igihugu, John Rwangombwa batanga ibisobanuro ku kibazo cy’inguzanyo ya VUP cyagaragajwe ku munsi wa mbere w’inama y’umushyikirano.

Perezida Kagame yatangiye agira ati “Ndibuka hagati ya VUP na Sacco ariko byombi bibereyeho mu buryo bwo gushakisha uko twarwanya ubukene mu baturage tukazamura amikoro yabo kandi yacu y’igihugu. Hari n’izindi porogaramu nyinshi ziriho mu nzego zitandukanye.

Twahoze tuganira mbabwira ko iyo twahuye n’uko n’ejo bundi nahuye n’urubyiruko iteka havuka ibibazo muri ayo mahuriro tuba twahuriyemo, abaza ibyo leta ikora […] ikibazo ni ukuvuga ngo leta iyo igiye gushyiraho ingamba nk’izi, iba yazishyiriyeho gukemura ikibazo […] Ariko ngira ngo ejo niba mwarakurikiye nkuko twese twakurikiye, ibiganiro uko byagenze, byerekanaga ko inzego za leta ntitubyumva kimwe, ziravuga ibintu bitandukanye ku kibazo kimwe twafatiye ingamba.

Icyatumye nsaba Minisitiri w’Intebe n’aba bayobozi bandi, bitari ugutanga ibisobanuro gusa, ni ukugira ngo bigire ibyo tuvanamo byo kugira ngo ibyo twafatiye ingamba ntabwo abayobozi ibintu bigira aho bigera ngo umuntu abihindure ibye,ni porogaramu ya leta.”

Perezida Kagame yavuze ko bidakwiye ko gahunda ya leta umuntu ayihindura iye.

"Ibwisobanuro bw’abaminisitiri bwahurije ku kuba SACCO ifata VUP nk’umutungo wayo"

Minisitiri w’Intebe, Dr Edouard Ngirente, yatangiye yisobanura avuga ko mu biganiro byatanzwe ejo, abayobozi mu bisubizo byabo byagaragaye ko habayemo ukudahuza, no kudakorana kw’inzego.

Yavuze ko kuva mu 2010, uburyo amafaranga VUP yatanzwe bitandukanye n’uko bwari bwemejwe, byatangiye inyungu ari 2%, amafaranga atangwa na Minisiteri y’Ubutegetsi bw’Igihugu ku bakene.

Yakomeje avuga ko nyuma byinjiye mu Umurenge Sacco bihindura isura kuko ya mafaranga yari agenewe gufasha abakene yatangiye gutangwa nk’inguzanyo isanzwe inyura mu buryo bw’imikorere y’amabanki ku nyungu ya 11%.

Ati “Ndemera ko hari ibitaragenze neza.Ariko turihafi kubikosora”.

Minisitiri w’Ubutegetsi bw’Igihugu, Prof Shyaka Anastase, yavuze ko amafaranga ya VUP atari aya Sacco kuko yo ifite imari shingiro yayo naho VUP ikaba amafaranga yandi leta yashyizeho agamije kuzamura imibereho y’abaturage y’abakene.

Yasobanuye ko hari ibibazo bitatu byatumye habamo urujijo muri ibi bya SACCO na VUP.

Icyambere n’ikibazo k’ikurikirana rya VUP;kuko ntabwo yakurikiranwe ngo harebwe niba atanga umusaruro.

Icyakabiri ngo ni ukuba amafaranga ya VUP yariswe aya SACCO kandi ifite umutungo wayo.

Aha yagize ati “Byabaye ibigenwa n’uko Sacco ibyumva asa n’aho abaye amafaranga asanzwe ajya mu bucuruzi.”

Yavuze ko VUP itangira yakoreraga mu mirenge 120, uwo mwaka abanyarwanda basaga ibihumbi 150 bari bahawe aya mafaranga. Uyu mwaka n’ushize ikorera mu mirenge irenga 250 ariko abayigannye bari munsi y’ibihumbi 30.

Icya gatatu ngo ’imicungire mibi ya VUP mu ntangiriro;kuko hari abayahabwaga bakambura ntibishyure cyangwa bakiba.

Minisitiri Shyaka yavuze ko ikibazo cy’ibijyanye n’abatishyura atari umwihariko w’igihe cya mbere gusa ahubwo n’ubu biraba,bityo ngo iyo ntiyaba intandaro yo kutabihindura maze yemere ko bigomba guhinduka.

Yavuze kandi ko ayo mafaranga azakomeza kunyura muri SACCO ariko ntafatwe nk’aho ari umutungo wa SACCO kuburyo yashyiraho amabwiriza yayo.

Yasezeranyije Perezida Kagame ko bagiye guhindura imikorere y’uburyo bakurikirana izo gahunda bikava mu mpapuro ahubwo bikajya no kuzikurikirana ku ngaruka bigira ku baturage byaba binyuze muri SACCO cyangwa ahandi.

Guverineri wa Banki Nkuru y’Igihugu, John Rwangombwa, yavuze ko habayemo amakosa,amafaranga yari agenewe abatishoboye aho kugira ngo bayahabwe ngo ibateze imbere bayahabwa nk’inguzanyo ya banki.

Yavuze ko Sacco yari ikwiye kuba nk’umuyoboro abakene baherwamo amafaranga abagenewe, gusa yizeza ko ibibazo bigiye gukosorwa.

Minisitiri w’Imari n’Igenamigambi, Dr Uzziel Ndagijimana we yemeye ko SACCO atari nyir’amafaranga ya VUP ahubwo ko ari umuyoboro w’aho yanyuzwa maze igahemberwa akazi yakoze.

Yavuze kandi ko nka MINECOFIN kuba amafaranga ava mu ngengo y’imari nabo bagiye kuzajya bagira uruhare mukumenya uburyo yakoreshejwe kandi akagera ku ntego.

Minisitiri w’intebe yasoje avuga ko bagiye gushyirahamwe nk’abo bireba bagiye gukosora iyo mikorere mibi ahantu hose.

Minisitiri w’Intebe ati “Imikorere mibi tuzayikosora ahantu hose hashoboka.”

Ku byerekeranye na SACCO ngo gahunda ihari ni ukubanza gukurikirana abayobozi bayambuye ndetse no kutihanganira ko umuyobozi wo mu nzego z’ibanze aba ari uwambere mu kuguza muri SACCO kandi abakaba n’uwambere mu batishyura.

Minisitiri yasezeranyije Perezida Kagame ndetse n’abanyarwanda muri rusange ko hagiye kurebwa uburyo uwo muyobozi wambuye SACCO kandi ahembwa azishyura mu buryo bwihuse.Aha ngo hazarebwa ku mushahara we kandi nyuma akazabihanirwa kugira ngo ibyo bibazo byose bivugwa muri za SACCO bicyemuke ndetse n’ibindi bibazo muri rusange.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru

Inkuru zikunzwe