Yashyizweho kuri30 December, 2016 | 15:50

U Rwanda rwatanze imbanzirizamushinga y’ubucuruzi bwifuzwa n’ibihugu birimo u Burusiya

Ambasaderi w’u Rwanda mu Burusiya, Jeanne D’Arc Mujawamariya, yashyikirije Minisitiri Valovaya Tatyana Dmitriyevna ushinzwe iterambere muri Komisiyo y’Umuryango w’Ubukungu bw’u Burayi na Aziya y’Amajyaruguru (Eurasian Economic Union); imbanzirizamushinga y’ubufatanye hagati y’Umuryango wa Afurika y’Iburasirazuba (EAC) n’uwo muryango.

EEU igizwe n’ibihugu bitanu birimo Armenia, Belarus, Kazakhstan, Kyrgyzstan n’u Burusiya, rikaba isoko ryagutse rigizwe n’abaturage basaga miliyoni 183 n’umutungo mbumbe wa tiriyali z’amadolari zisaga enye. Ubwo amasezerano ashyiraho EEU yashyirwagaho umukono kuwa 29 Gicurasi 2014, hahise hashyirwaho uburyo bwo guhuza za gasutamo no koroherezanya mu bijyanye n’ubukungu.

Amb. Mujawamariya yabwiye Radio 10 ko ubu bufatanye buzatuma u Rwanda n’ibihugu bya EAC bibasha kohereza muri ibyo bihugu ibicuruzwa byiganjemo ibikomoka ku buhinzi.

Ati “Hari Ikawa, icyayi, dufite imbuto, imboga batagira, uretse ko natwe dushobora kubigiraho uburyo umuntu abika ibiryo amezi yandi icyenda y’ubukonje ntibyangirike.”

“Isoko rya hano ni rinini cyane ntabwo u Rwanda rwonyine rwahaza u Burusiya, ariko umuryango w’ibihugu bya Afurika y’Iburasirazuba wagira aho ukora kuri iri soko, kuko Ikawa n’icyayi by’u Rwanda n’iyo twabizana mu mujyi wa Moscow ntabwo twawuhaza kuko urimo abantu bakabakaba miliyoni 17.”

Mu gufungurirana amarembo kw’imiryango yombi, bizanatuma u Rwanda ruhendukirwa n’ibyo rutumiza mu mahanga birimo amafumbire mvaruganda n’imashini zikoreshwa mu buhinzi bitumizwa i Burayi nyamara ugasanga hari ubwo byaranguwe mu bihugu biri muri Eurasia.

Biteganywa kandi ko bizafasha mu bukerarugendo no kumenyekanisha umuco w’u Rwanda n’ubukorikori, ku buryo nk’uko imbanziriza mushinga ibigaragaza, abasaga 67 000 basura pariki mu Rwanda buri mwaka baziyongera na miliyari 400 Frw u Rwanda ruvana mu mu byo rwohereza mu mahanga zikazamuka.

Mu 2014 nibwo ibiganiro kuri iyi gahunda y’imikoranire byatangiye hagati y’abadipolomate b’ibihugu bya EAC na Komisiyo y’Umuryango bibera muri Ambasade ya Kenya mu Burusiya, u Rwanda ruhagarariwe na Ambasaderi Jeanne d’Arc Mujawamariya n’umunyamabanga wa mbere Francis Karagire.

Abadipolomate b’ibihugu bya EAC bemeranyije ko abacuruzi bajya bishyura umusoro bagiye kwinjira muri umwe muri iyi miryango gusa, kurusha uko byajya biba kuri buri gihugu, hagamijwe kuzamura urwego rw’ubucuruzi muri Afurika y’Iburasirazuba.

Biteganyijwe ko aya masezerano aramutse asinywe n’impande zombi yatangira gukurikizwa mu mwaka utaha wa 2017. Bimwe mu byo ibyo bihugu birimo u Burusiya bishobora kohereza mu Rwanda harimo imitungo kamere, ubushobozi bw’abakozi, ikoranabuhanga mu nganda n’imashini zikoreshwa mu buhinzi.

Yanditswe na Ubwanditsi/MUHABURA.rw


Tanga igitecyerezo

Amazina
Ubutumwa

Izindi nkuru