Yashyizweho kuri3 December, 2018 | 21:18

Rwamagana:Ubwoba ni bwose ku baturage bitewe na makadamiya zibwe zikaburirwa irengero

Ubaturage batuye mu murenge wa Rubona mu kagari ka Byahi mu midugudu ya Gitwa na Mahoro bahangayikishijwe n’uburyo ubuyobozi bw’umurenge bwabaciye amafaranga ibihumbi bitanu (5000frw) buri rugo ubwo hibwaga imbuto za makadamiya z’umushoramari wazihinze muri uyu murenge.

Nyuma yo kwibwa kw’izi mbuto,ubuyobozi bw’umurenge bwahise butegeka ko abaturage bagomba gushaka uwazibye niba batamubonye bazahita bishyura ayo mafaranga.

Abaturage baganiriye n’umunyamakuru wa Muhabura.rw bavuze ko badashobora kuriha amafaranga y’ibintu batibye ndetse batanazi ngo ni byananga bazitabaza inzego nkuru z’igihugu zibarenganure.

Umwe yagize ati”Umuntu wese ubuze akantu ngo abaturage ni barihe ni barihe,icyo kintu ntabwo nemeranya n’ubuyobozi nubwo baturihisha ntabwo izi twaziriha”.

Undi agira ati“Abayobozi b’umurenge na ba daso baraje mu nama batubwira ko buri rugo ari ugutanga ibihumbi ibihumbi bitanu.twavuze ko tuzabaza hejuru twakumva bishoboka tukayatanga twakumva bidashoboka ubwo ni uko”.

Ngo n’ubwo icyemezo cy’ubuyobozi ari itegeko abaturage bamaze kugitera utwatsi ngo kuko ntibagumya kwishyurira abajura kandi bishyura amafaranga y’umutekeno.

Hari undi wagize ati “Amafaranga twaciwe twavuze ko ntayo twatanga.Ntabwo twarihirira ibisambo buri munsi”.

Bakomeza bavuga ko bazayatanga ari uko beretswe ahanditse ko uwuzajya yibwa bazajya bateranya amafaranga y’ibyo yibwe bakamuriha.

Umunyamabango nshingwa bikorwa w’umurenge wa Rubona Byaruhanga Jhon ushyirwa mu majwi yatangarije Muhabura.rw ko izo makadamiya zingirijwe ndetse ziribwa ariko abasaba kuvuga uwabikoze banze kumuvuga abatera ubwoba ko nataboneka bariburihe izo makadamiya.

Yagize ati“Ni abibye makadamiya barangiza bakazivunagura.Ndababwira ngo rero ni muduhe amakuru y’abantu bakora ibi bintu,nabo barambwira ngo ntawe bazi”.

Hanyuma batamuvuze mpita mbabwira ngo ubwo mwese mwarabikoze cyangwa se ababikoze murabazi ahubwo murabahishira.Ubwo mpita mbabwira ko niba babahishiriye ingaruka ziraje zigere ku midugudu yose”.

Yakomeje avuga ko nta muturage uzatanga ayo mafaranga ahubwo ibyo yabikoze ari ukugirango abatere ubwoba kugirango bashake igisambo cyaba kibye izo makadamiya.

Umuyobozi w’akarere ka Rwamagana ushinzwe imibereho y’abaturage Madame UMUTONO Jeanne yabwiye umunyamakuru wa Muhabura.rw ko biramutse bigaragaye ko hari umuyobozi waciye amafaranga abaturage azabihanirwa kuko inzego z’umutekano zigomba gukora iperereza hagashakishwa abibye izo makadamiya.

Ati"Nta muyobozi wemerewe kwaka umuturage amafaranga kuko uyu n’uyu yibwe.icyo yakora ni ukwegera abaturage aho hantu umuturage wibwe hagashakwa amakuru uwamwibye cyangwa uwamwangiririje akamenyekana".

Yungamo ati”Icyo gihe ndumva umuyobozi yabihanirwa aramutse yaraciye abaturage amafaranga kubera mugenzi wabo wibwe.Numva ibyo ngibyo byo haramutse haramutse hari uwabikoze yabihanirwa n’amategeko”.

Akomeza yemeza ko nta muyobozi n’umwe watinyuka gukora ibintu nk’ibyo cyeretse ari ibyo yitekerereje ku giti cye kuko ngo nta tegeko ribimwemerera ariko bibaye byo yabihanirwa by’intanga rugero.

Iyo midugudu uko ari ibiri uwa Gitwa na Mahoro igizwe n’ingo 195 zose hamwe zizatange amafaranga agera ku bihumbi 975000 by’amafaranga y’u Rwanda.

Si ubwa mbere ibi bibaye muri uyu murenge ngo ahubwo umaze kubigira akamenyero aho hangizwa ibintu runaka habura uwabikoze abaturage bose bakabyishyura.kuko byabaye ubushize ubwohatemwaga insina z’umuturage habura uwazitemye abaturage bose bo muri iyo midugudu bagacibwa amafaranga 2000 byo kwishyura izo nsina nk’uko umunyamakuru wa Muhabura.rw yabitangarijwe n’umuyobozi w’uwo murenge.
Imbuto za makadamiya bivugwa ko zibwe ni izeze Uyu mugabo ngo n’ubwo yazikoragamo ngo nawe ntamakuru yazo afite Abaturage bo bavuga ko niba nta gisambo cyafashwe nyir’umurima agomba kwihombera ariko ibyo kubarihisha ntibabyumva
Rwamagana:Nzabandora Theogene /MUHABURA.RW


Tanga igitecyerezo

Amazina
Ubutumwa

Izindi nkuru