Yashyizweho kuri8 January, 2018 | 14:25

Rutsiro: Abahinzi ntibari bazi uburyohe bw’icyayi bahinga

Nyuma y’uko mu minsi yashize abahinzi b’icyayi bo mu turere twagenewe guhingwamo iki gihingwa ndetse n’abandi bakozi bakora mu mirima yacyo imirimo yo kugihinga no kugisarura bavugaga ko ugereranije ingufu bakoresha n’ibyo bakura muri uyu murimo w’ubuhinzi bahahombera aho gutera imbere, byongeye bakaba baravugaga ko nubwo bahinga icyayi batazi uburyohe bwacyo, abahinzi bo mu karere ka Rutsiro barishimira ko uruganda bafite rwatumye babona inyugu, ndetse bakanamenya uko icyayi bahinga kiryoha.

Nyuma yo kubona uruganda rutunganya icyayi rwa Rutsiro Tea Factory, abahinzi b’icyayi bo mu karere ka Rutsiro bavuga ko bishimira umusaruro ndetse n’ibyiza bakura mu buhinzi bw’icyayi, ngo kuko mbere ntibari bazi uburyohe bw’icyayi bahinga, ariko ubu bamaze kubwumva ndetse ngo bakura muri ubu buhinzi agatubutse mu bijyanye n’amafaranga.

Bamwe mu bahinzi baganiriye Muhabura.rw bavuga ko bateye imbere bitewe n’igihingwa cy’icyayi, aho bavuga ko ugereranije no hambere ubu ingufu bakoresha n’umusaruro babona bidahabanye.

Umwe mu bahinzi twasanze mu murima basarura icyayi

Umwe mu bahinzi twasanze mu murima basarura icyayi yagize ati: “Ubu turasobanutse kubera icyayi cyacu cyahawe agaciro no mu mahanga, ubundi twarahingaga tugasarura, ibindi ntitumenye uko bigenda n’uko icyayi cyacu kiryoha, ariko ubu tubona ku ifaranga, ndetse tukanasomaho….Nukuri kose turakinywa.”

Undi nawe ni umukozi twasanze asarura icyayi, avuga ko ahabwa ibikoresho byose akenera mu kazi ke ka buri munsi, ndetse ngo akaba ahembwa neza cyane, ikindi akaba yariteje imbere kubera icyayi, aho yagize ati: “Ubu ibyangombwa byose barabiduha, kandi baduhemba neza, ubu njye maze gutera imbere niguriye inka, niyubakira inzu, n’abana bariga neza nta kibazo; ibyo byose mbikesha gukora mu cyayi.”

Ibi bishimangirwa na Nsanzimfura Jean Damascene, Umuyobozi wungirije w’Uruganda rwa Rutsiro Tea Factory, aho avuga ko iyo umuturage uhinga icyayi aje ku ruganda ahabwa ku cyayi cyatunganijwe baze akumva uburyohe bw’igihingwa ahinga.

Nsanzimfura Jean Damascene akomeza avuga ko kubera ko uruganda rukiri rushya hari gahunda bafite yo gushyiraho iduka ricuruza icyayi ku buryo umuhinzi wacyo azajya ava mu murima akakigura ku giciro kiri hasi, ugereranyije n’uko ahandi bakigura.

Yagize ati: “Twebwe abaturage bacu baradusura tukabaha ku cyayi, nababwiye ko uruganda rwacu rukiri rushya, ariko ubungubu tugiye gushyiraho Shop, umuturage uvuye mu murima agure icyayi no kumafaranga make ugereranije n’uko tugurisha abandi.”

Uruganda rwa Rutsiro Factory Tea rumaze imyaka itatu (3) rukora, aho rwatangiye mu mwaka wa 2014, rukaba rwari rufite ubushobozi bwo gutunganya toni 70 ku munsi ariko kuri ubu kuko umusaruro ukiri muke rutunganya toni 15 ku munsi.

Nsanzimfura Jean Damascene, Umuyobozi wungirije w’Uruganda rwa Rutsiro Tea Factory

Gusa Nsanzimfura Jean Damascene avuga ko bafite icyizere ko mu minsi iri imbere ruzaba rutunganya toni nyinshi ngo kuko akurikije uburyo abaturage batangiye gukunda ubuhinzi bw’icyayi bazageraho bagere ku itarambere rishimishije.

Akomeza avuga ko ukurikije uko igiciro abaturage bagurirwagaho umusaruro mu minsi yashize, n’icyo bagurirwaho ubu usanga abaturage bacyishimiye ngo kuko mbere cyari ku mafaranga y’u Rwanda 180, ariko ubu kikaba kiri ku 274, aha avuga ko ibiciro bishyirwaho ku rwego mpuzamahanga, ariko ngo kuko icyayi cyabo gifite umwihariko.
Imirima y’Icyayi

Yanditswe na Ruhumuriza Richard


Tanga igitecyerezo

Amazina
Ubutumwa

Izindi nkuru