Yashyizweho kuri13 June, 2017 | 08:57

Polisi yafashe ikamyo yari ipakiye toni 2 z’amabuye y’agaciro

Polisi ikorera mu karere ka Ngororero yafashe ikamyo yari ipakiye toni 2 z’amabuye y’agaciro yo mu bwoko bwa Amethyst mu buryo bwa magendu iyakuye mu kirombe cya Sovu kiri muri ako karere.

Umuvugizi wa Polisi mu ntara y’Uburengerazuba Chief Inspector of Police (CIP) Theobald Kanamugire, yavuze ko iyi modoka yafashwe kuko itari ifite impapuro ziyemerera gutwara amabuye y’agaciro.

Yavuze ati:”Iyi modoka yo mu bwoko bwa Dyna ifite nomero ziyiranga RAC 369 A, ubu ifungiye kuri Sitasiyo ya Polisi ya Ngororero, ndetse n’umushoferi wayo nawe akaba ariho afungiye mu gihe iperereza rikomeje.”

Iyi modoka yafashwe nyuma y’aho mu kwezi gushize na none Polisi yari yafatiye mu karere ka Rutsiro indi modoka yo mu bwoko bwa Landcruiser, ifite numero ziyiranga RAC 251G, nayo ipakiye ibiro 173 by’amabuye y’agaciro mu buryo bwa magendu.

CIP Kanamugire yakomeje avuga ati:”Amabuye y’agaciro acukuwe mu buryo bwemewe n’amategeko ni kimwe mu bitanga imisoro yo kubaka igihugu cy’u Rwanda, ikindi kandi kuyacukura bisabirwa uburenganzira butangwa n’inzego zibishinzwe, hari n’amabwiriza abigenga, niyo mpamvu ubikora adakurikije ayo mabwiriza aba anyuranyije n’amategeko kandi ibyo Polisi y’u Rwanda ntiyabyihanganira.”

U Rwanda rwahagaritse ubucukuzi bw’amabuye y’agaciro mu ishyamba rya Gishwati mu rwego rwo kuribugabunga kuko ryari rigiye gushiraho.

Yongeyeho ko ibikorwa nk’ibi nta kindi biba bigamije uretse kunyereza imisoro; ko mu bisanzwe amabuye y’agaciro agomba kuba afite ikimenyetso mbere y’uko agira aho ajyanwa n’ababifitiye uruhushya.

CIP Kanamugire avuga ko ubucukuzi bw’amabuye y’agaciro nabwo bufite amategeko bukorwamo kugirango bwuzuze ibisabwa kandi bubungabunge ibidukikije.

Ingingo ya 438 mu gitabo cy’amategeko ahana ivuga ko umuntu wese wiha gukora imirimo y’ubushakashatsi cyangwa iy’ubucuruzi bw’amabuye y’agaciro bitemewe n’amategeko, ahanishwa igifungo kuva ku mezi atandatu (6) kugeza ku mwaka umwe (1) n’ihazabu y’amafaranga y’u Rwanda kuva kuri miliyoni eshatu (3.000.000) kugeza kuri miliyoni icumi(10,000,000) cyangwa kimwe gusa muri ibyo bihano

Biciye mu ishami ryayo rirengera ibidukikije, Polisi y’u Rwanda yibanda mu kurwanya magendu no kureba ko amategeko yubahirizwa mu bijyanye n’ibidukikije , kubungabunga ibidukikije biciye mu bukangurambaga ndetse n’ibikorwa byo kubibungabunga.

Binyuze mu bukangurambaga , Polisi yafashe ibiro 600 bya worufuramu ya magendu muri Werurwe uyu mwaka mu bice bya Rulindo, babiri bari inyuma y’icyo gikorwa bakaba barafashwe.

Ubucukuzi bw’amabuye y’agaciro ni kimwe mu byo u Rwanda rukuramo amafaranga , aho ruvana miliyoni 166 z’amadolari y’Amerika; igiciro cya worufuramu kikaba cyariyongereyeho 40% muri iki gihe.

Yanditswe na Niyomugabo/Muhabura.rw


Tanga igitecyerezo

Amazina
Ubutumwa

Izindi nkuru

Inkuru zikunzwe