Yashyizweho kuri18 December, 2018 | 11:08

Nyagatare:Abarimu ku isonga mu bakozi b’akarere 41 bambuye SACCO ayasaga miliyoni 30 Frw

Ubuyobozi bw’Akarere ka Nyagatare bwatangaje ko abakozi b’aka karere bagera kuri 41 bambuye ikigo cy’imari cya SACCO akayabo ka miliyoni 31 z’amafaranga y’u Rwanda.

Byagarutsweho mu nama y’umutekano yaguye y’Akarere ka Nyagatare yateranye ku gicamunsi cyo kuri uyu wa 17 Ukuboza 2018.Abakozi bavugwa bambuye imirenge SACCO ni abanyamabanga nshingwabikorwa b’utugari umunani bayifitiye asaga miliyoni 4Frw, abarimu 26 bafite miliyoni 17Frw n’abakozi b’ibigo nderabuzima birindwi bafite hafi miliyoni 10Frw. Ayo yose akaba ari umwenda ungana na miliyoni hafi 31Frw.

Umuyobozi w’Akarere ka Nyagatare Mushabe David Claudian avuga ko abo bantu bagiye bafata inguzanyo muri SACCO z’imirenge igihe cyo kwishyura kikarenga batarishyura.

Uyu muyobozi kandi yemeza ko icyo kibazo cyafashwe nk’ikingutu cyamaze guhabwa umurongo kuburyo bitazarenza Mutarama 2019 ayo mafaranga azaba amaze kugaruzwa.

Agira ati “Icyo cyahawe umurongo, bamwe bamaze kudusinyira amasezerano y’igihe bazishyurira, abandi nabo niyo nzira kuburyo bitagomba kurenza ukwezi kwa mbere batarishyura.

Gusa ariko na none hari aho bigaragara nk’imbogamizi, aho hari aho SACCO yaguzrizaga umwarimu amafaranga bigaragara ko kuyishyura bishobora kugorana.

Ikibazo nk’icyo ngo kigaragara mu murenge wa Kiyombe aho mwarimu yagurijwe miliyoni 7Frw kandi nta ngwate igaragara yatanzwe.

Mushabe David Claudian avuga ko bagiye gusuzuma urutonde rw’abo bantu, bamenye imibereho yabo, abo bishoboka bishyuzwe.

Ubuyobozi bw’aka karere bwiyemeje ko muri Mutarama 2019 igomba kurangira bamwe mu bakozi bambuye SACCO bamaze kwishyura.

Iki kibazo ni kimwe Perezida Kagame yasabye ko abaminisitiri 3 ndetse na Guverineri wa banki nkuru basobanura mu nama y’umushyikirano yabaye kuri tariki 13-14 Ukuboza 2018,aho Minisitiri w’intebe yemereye Perezida Kagame ko ikibazo cy’abayobozi bambura SACCO kizakurikiranwa bakishyura uwo mwenda.

Icyo gihe Minisitiri w’intebe Dr.Edouard Ngirente yagize ati"Ku byerekeranye na SACCO,gahunda ihari ni ukubanza gukurikirana abayobozi bayambuye ndetse no kutihanganira ko umuyobozi wo mu nzego z’ibanze aba ari uwambere mu kuguza muri SACCO kandi abakaba n’uwambere mu batishyura".

Minisitiri yasezeranyije Perezida Kagame ndetse n’abanyarwanda muri rusange ko hagiye kurebwa uburyo uwo muyobozi wambuye SACCO kandi ahembwa azishyura mu buryo bwihuse.

Kugira ngo uwo muyobozi yishyure, Minisitiri Ngirente yavuze ko hazarebwa ku mushahara w’uwo muyobozi kandi nyuma akazabihanirwa kugira ngo ibyo bibazo byose bivugwa muri za SACCO bicyemuke ndetse n’ibindi bibazo muri rusange.

Yanditswe na Habarurema Djamali


Tanga igitecyerezo

Amazina
Ubutumwa

1 Comment

Gashumba - 1 month ago

Birababaje kabsa

Izindi nkuru

Inkuru zikunzwe