Yashyizweho kuri30 January, 2019 | 09:37

Ngororero : Umugabo yatawe muriyombi azira gutanga ruswa kuri polisi

Polisi mu karere ka Ngororero mu murenge wa Kabaya yafashe umugabo uri mu kigero cy’imyaka 39 y’amavuko ukekwaho gutanga ruswa ku mupolisi kugirango arekure umuvandimwe we wafashwe akekwaho gukora no gucuruza inzoga z’inkorano.

Irakiza Godfrey niwe wafashwe akekwaho gutanga ruswa y’amafaranga y’u Rwanda ibihumbi icumi (10 000 frw) ku mupolisi ukorera kuri sitasiyo ya Polisi ya Kabaya kugirango harekurwe Uwimana Esperance ukekwaho gukora no gucuruza inzoga zitujuje ubuziranenge.

Chief Inspector of Police (CIP) Innocent Gasasira yavuze ko uyu mugabo yahamagaye umupolisi akamusaba ko bahura bakaganira ku cyibazo cy’umuvandimwe we.

Yagize ati “ Irakiza yahamagaye umupolisi amubwirako ashaka ko amufasha ku mande angana n’ibihumbi 200 mushikiwe yaciwe kubera gukora inzoga z’inkorano byibura yagabanuka akishyura 50 maze nawe akaba yamushimira.

Akomeza avuga ko uyu mupolisi yamusobanuriye ko amande acibwa abakora n’abacuruza inzoga z’inkorano agenwa n’inzego z’ibanze uyu mugabo ntiyabyumva ahubwo we yumva ko agomba gutanga ruswa.

CIP Gasasira akomeza asaba abaturage kubahiriza amategeko aho kwishora mu bikorwa byo gutanga ruswa kuko bigira ingaruka ku wabikoze.

Yagize ati “Uretse kuba ruswa ari icyaha gihanwa n’amategeko muge muzirikana ko yonona imiyiyorere myiza, ikimakaza akarengane n’itonesha ndetse ikanamunga ubukungu bw’igihugu

Kuri ubu Irakiza Godfrey yashyikirijwe urwego rw’Igihugu rw’ubugenzacyaha (RIB) kugirango hakorwe iperereza kubyaha akekwaho.

Aramutse ahamwe n’icyaha yahanwa n’ingingo ya 4 mu itegeko rihana ruswa aho riteganya ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

Niyomugabo Albert /MUHABURA.RW


Tanga igitecyerezo

Amazina
Ubutumwa

Izindi nkuru

Inkuru zikunzwe