Yashyizweho kuri7 December, 2016 | 17:11

Muhanga:Amafaranga arenga miliyari yagenewe abahinzi n’aborozi Ntarabona icyo akoreshwa

Ubuyobozi bw’umushinga ugamije gufata neza umusaruro, kuwongerera agaciro no kuwugeza ku isoko (Post Harvest and Agri.Business Support) PASP, butangaza ko hari amafaranga arenga miliyari yagenewe abahinzi n’aborozi magingo, aya atarabona icyo akoreshwa.

Mu nama nyunguranabitekerezo y’umunsi umwe yahuje amakoperative y’abahinzi n’aborozi, ubuyobozi bw’umushinga PASP n’inzego z’Akarere ka Muhanga, Gisagara Emmanuel, umukozi w’uyu mushinga yagaragaje ko mu gihe abahinzi n’aborozi baba badakoresheje aya mafaranga, azasubizwa abaterankunga.

Gisagara yabivuze ahereye ku mubare muto w’abakora umwuga w’ubuhinzi n’ubworozi bakoze imishinga yabo neza kugira ngo ihabwe amafaranga, akavuga ko imishinga ibiri gusa ari yo imaze kubona inguzanyo, akaba avuga ko ari mike cyane ugereranyije n’iyagombye kuyihabwa.

Yagize ati «Twifuza ko mutegura imishinga yanyu vuba, aya mafaranga yose atarasubizwayo kubera ko ari mwe yagenewe kandi abashinzwe kugenzura ko ikozwe neza bahari.»

Mukankusi Alphonsine, Umuyobozi wa Koperative y’iterambere ry’abahinzi borozi ba Makera iherereye mu murenge wa Nyamabuye, avuga ko bashyikirije banki umushinga wa miliyoni zirenga magana atandatu zo kugura ibikoresho byo kongerera ubwiza umusaruro birimo imashini igosora, inyubako n’imodoka yo kugeza umusaruro ku isoko, ariko ngo ntibarabona igisubizo.

Uyu muhinzi-mworozi akavuga ko hari abahinzi bagifite imbogamizi ziterwa n’uko amwe mu mabanki atagiriza icyizere abahinzi n’aborozi ku buryo yabaha inguzanyo.

Umucungamutungo w’ikigo cy’imari Duterimbere, Munyembabazi Innocent wari witabiriye iyi nama, yavuze ko nta mushinga uteguye neza bari bima amafaranga y’inguzanyo, yongeraho ko no mu mihigo bahize harimo kudatinza imishinga isaba inguzanyo ku buryo mu minsi itarenze 12 baba barangije guha inguzanyo abakiliya bayifuza.

Yagize ati «Jye mbona impamvu nyamukuru ituruka mu kutamenya amakuru ajyanye n’ikoreshwa ry’aya mafaranga, bibaye ngombwa abayobozi bajya banyuza ubutumwa nk’ubu mu miganda no mu nteko z’abaturage.»

Kuva uyu mushinga wa Minisiteri y’Ubuhinzi n’Ubworozi watangira umaze guha abahinzi n’aborozi inguzanyo ya miliyoni 694 z’amafaranga y’u Rwanda mu gihugu hose.

Yanditswe na MUHIZI ELISÉE


Tanga igitecyerezo

Amazina
Ubutumwa

Izindi nkuru