Yashyizweho kuri7 May, 2019 | 13:15

Masaka:Inkongi y’umuriro yibasiye igice kimwe cy’isoko yangiza ibitari bicye[AMAFOTO]

Inkongi y’umuriro yabasiye igice cyo hanze y’isoko ryo mu Gahoromani, ahantu haba ibyuma bisya imyumbati, yangiza ibicuruzwa byinshi byiganjemo ibiribwa.

Iyi nkongi y’umuriro yadutse mu rukerera ihera mu gice cy’isoko cyacururizwagamo ibiribwa. Ahahiye n’urukurikirane rw’amazu yubakishije amabati yarimo ububiko bunini bw’imyumbati ndetse n’imashini zo kuyisya kugira ngo ikurwemo ifu y’ubugari.

Umunyamabanga Nshingwabikorwa w’Umurenge wa Masaka, Vincent Nsengiyumva, yabwiye umunyamakuru ko byabaye ahagana saa kumi n’imwe n’igice za mu gitondo kuri uyu wa kabiri tariki 07 Gicurasi 2019.

Umuriro watwitse ibyo byuma bisya imyumbati, utwika n’imyumbati myinshi yari ihari, utwika n’imodoka yari yaharaye yo mu bwoko bwa Dyna ariko ntihamenyekanye icyawuteye.

Nsengiyumva yavuze ko kugeza mu ma saa tatu za mu gitondo ibikorwa byo kuzimya umuriro byari bigikomeje kuko umuriro winjiye mu myumbati gushiramo biragorana.

Abatuye hafi y’ahabereye iyi mpanuka bavuga ko habanje kumvikana ibintu biturika baketse ko ari insinga z’amashyanyarazi, mbere yuko umuriro waduka. Uyu muriro w’amashyanyarazi ni nawo ukekwa ko wateye iyi nkongi.Gusa urwego rw’igihugu rw’iperereza ngo rwatangiye kugenzura icyaba cyateye iyi mpanuka .

Umwe mu bacururiza muri aka gace, Alexis Habarugira, yavuze ko bikimugoye kumenya ibyangiritse.

Ati "Kugeza ubu sindashobora kubarura ibyahiye ariko murabona ko imashini zose zahiye, imyumbatsi yose yahiye, inyubako ndetse hari n’imodoka yanjye yahiye. Ndakeka ko ibyangiritse bitajya munsi ya miliyoni 500 z’amafaranga y’u Rwanda".

Ibyuma 12 ni byo bivugwa ko byahiye, bikaba byari biherereye mu Kagari ka Gako mu Murenge wa Masaka, hanze y’isoko ryo mu Gahoromani. Byari iby’uwitwa Murokore, agaciro k’ibyangiritse kakaba katahise kamenyekana.

Imodoka zabugenewe ebyiri z’ishami rya polisi rishinzwe kuzimya umuriro zatabaye zihangana n’iyo nkongi y’umuriro.


Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru