Yashyizweho kuri8 May, 2017 | 13:14

Kutihanganira ruswa biri mu bizana u Rwanda ku isonga

URwanda rwavuye ku mwanya wa 139 mu bihugu 190, rugera ku wa 56 mu koroshya ikorwa ry’ubucuruzi n’ishoramari “Doing Business”, ibi bigatuma ruza ku mwanya wa kabiri ku isi mu gukora amavugurura mu korohereza ishoramari mu gihe cy’imyaka 12 ishize. Dr. James Gatera, umuyobozi mukuru wa sosiyete y’ishoramari “Crystal Ventures” avuga ko ibi bituruka ku buyobozi buhamye igihugu gifite.

Kuri ibi byagezweho, Dr James Gatera, aganira na “The World folio” yavuze ko kutihanganira ruswa biri mu bizana u Rwanda ku isonga.

Yagize ati “U Rwanda rufite ubuyobozi buhamye. Mu rwego rw’ubucuruzi, amaraporo akorwa adushyira ku rwego rwo hejuru. Hari gahunda yo kutihanganira ruswa. Abantu baza muri iki gihugu kuko twashyizeho uburyo bunoze. Haba ku mpamvu z’ubukerarugendo cyangwa se impamvu z’ubucuruzi…

Aya mavugurura yakozwe mu korohereza ishoramari, agamije kugeza igihugu ku ntego zacyo z’icyerekezo 2020. Gahunda y’imbaturabukungu ya kabiri (EDPRS 2) yibanze kuri aya mavugurura na gahunda ndetse n’imishinga hirya no hino mu gihugu birimo gushyirwa mu bikorwa kugira ngo iterambere ry’igihugu rikomeze.

Kuri iyi ngingo, Eugene M. Haguma, umuyobozi mukuru wa Horizon Group, yagize ati “Nizera ko u Rwanda rwubatse umusingi ukomeye cyane mu guha inzego imbaraga muri iki gihugu.”

Akaba avuga ko hashyizweho imirongo ngenderwaho na gahunda byo kugenderaho, inzego zikubakwa.

Haguma akomeza agira ati “Hagezweho byinshi, ibyo tubona mu nzego zinyuranye, haba mu miyoborere cyangwa se mu bukungu bwose muri rusange. Harebwe mu bucuruzi hagezweho byinshi naho, buri mwaka tubona horoshywa kandi hihutishwa uburyo bw’ishoramari.”

Ubukungu bw’u Rwanda mu myaka ibarirwa mu icumi ishize bwateye imbere, habaye impinduka igaragara mu nzego zose, mu bikorwa remezo by’ubwikorezi, gukwirakwiza amashanyarazi, gukurura ishoramari ry’amahanga mu nzego zinyuranye no kurwanya ruswa.

Mu rwego rwo gukomeza iterambere ryagezweho n’u Rwanda, aho ubukungu bwazamutse ku mpuzandengo ya 8% buri mwaka kuva mu 2001 kugera mu 2015, Guverinoma y’u Rwanda yashyizeho gahunda zizatuma ubukungu burushaho kuzamuka mu gihe kirambye. Gahunda za Guverinoma muri uru rwego zageze mu nzego nyinshi z’ubukungu, aho abikorera kuri ubu bashobora gushora imari mu buhinzi, inganda z’imyenda ndetse no mu rwego rwa serivise.

Yanditswe na Ubwanditsi/Muhabura.rw


Tanga igitecyerezo

Amazina
Ubutumwa

Izindi nkuru