Yashyizweho kuri20 October, 2016 | 12:13

Kirehe: Abagore baje imbere mu kwesa imihigo y’umwaka ushize

#Abagore nibo baje mu myanya y’imbere aho imirenge ibiri iyoborwa n’abagore muri 12 yo muri aka karere yaje mu myanya itatu y’imbere

#Gitifu w’intara yasabiye abahize abandi kuzamurwa mu ntera uwari ayoboye umududugudu akazamurwa akayobora akagari n’uwari ayoboye akagari agahabwa Umurenge wo kuyobora

#Abaturage bo mu karere ka Kirehe bahawe umwanya uhagije mu mihigo y’uyu mwaka 2016-2017

Abayobozi babaye indahyikirwa mu kwesa imihigo y’umwaka ushize wa 2015-2016 mu karere ka kirehe bahembwe aho mu myanya y’imbere mu mirenge n’ibigo bya Leta bikorera muri aka karere haje abagore ndetse bamwe muri aba bayobozi basabiwe n’umunyabanga nshingwabikorwa w’intara y’I burasirazuba kuba bazamurwa mu ntera.

Mu muhango wari haburiwemo n’Abagize komite mpuzabikorwa y’akarere ka kirehe mu nama yabahuje kuri uyu wa 19 ukwakira 2016, ubwo bahuriraga mu nama nyungurana bitekerezo igamije gusuzuma ibyagezweho mu mwaka ushize w’imihigo, muri iyi nama kandi yanabereyemo umuhango wo gusinya ku mihigo y’uyu mwaka turimo wa 2016-2017 aho abayobozi b’ibanze kuva ku mukuru w’umudugudu kugeza ku rwego rw’akarere bagiye bagaragariza urwego rubakuriye imihigo bakaboneraho no gusinya kuri iyo mihigo muri uyu muhango kandi hahembwe abitwaye neza mu mihigo y’umwaka ushize.

Abagize inzego z’imidugudu muri aka karere bagiye bagaragaza ko uruhare rw’umuturage mu mihigo y’uyu mwaka wa 2016-2017 ari byo bizabafasha mu kuyesa, ibi bikaba bigaragarira mu buryo bwo gusinya iyi mihigo aho buri mukuru w’umudugudu yagiye asinyana imihigo n’ingo zibarizwa mu mudugudu hanyuma n’umukuru w’umudugudu akazasuzuma imihigo y’ingo zose nawe agategura imihigo azageza ku mukuru w’akagari kuzamuka kugeza ku rwego rw’akarere.
Ku rundi ruhande ariko abayobozi b’imidugudu bakomeje gusaba inyoroshyakazi nko kuba bahabwa ubwisungane mu kwivuza n’ibindi bikorwa byabafasha mu kuba batunganya akazi

Mvuyekure Justin ayobora Umudugudu w’Umunezero, mu Kagari ka Kiremera mu Murenge wa Kigarama yagize ati “Twebwe abakuru b’imidugudu dukora akazi kadusaba gukora amanywa n’ijore kandi nk’uko mu bibona turavunika cyane pe (….) mu by’ukuri turasaba akarere ko kajya kadufasha muri gahunda zinyuranye bakadutangira nk’ubwisungane mu kwivuza abadafite inzu zo kubamo bakatwubakira ndetse erega bakadushakira n’amashanyarazi kugirango tujye dukora ama raporo nijoro tudakoreye ku gatadowa”

Umunyamabanga nshingwabikorwa w’Umurenge wa Gatore, Madam Kanzayire Console wanabaye uwambere mu mihigo y’umwaka ushize yabwiye MUHABURA.rw ko bagiye gukora ibishoboka byose bagafasha ba midugudu kuko nibo bayobozi bambere baba bari hafi y’abaturage.

Gitifu Console ati “Ubusanzwe abayobozi b’inzego z’ibanze baba bagize komite z’imidugudu nibo badufasha kuba indashyikirwa mu kwesa iyi mihigo yewe n’iki gikombe tuba tubonye niba tugikesha niyo mpamvu rero ubufatanye badusaba bwose tugomba kububaha ikindi n’izo gahunda zose baba bifuza kugenerwa urugero nk’aba bifuza ko batangirwa ubwisungane mu kwivuza turagerageza tukazibaha”

Kuri ubu busabe bwa ba mudugudu muri kirehe, Umuyobozi w’aka karere MUZUNGU Gerard yababwiye ko izi gahunda zisanzwe ziriho ariko aho zitari zagera ni uko bataragerwaho ariko nabo batekerejweho

Mayor MUZUNGU Gerard ati “Ku ruhande rw’ubuyobozi bw’akarere icyo tuba dusabwa cyose ngo ishyirwa mubikorwa ry’imihigo rijye mu buryo tugomba kugerageza kubikora aha niba ari izo gahunda ziborohereza mu mibereho yanyu ya buri munsi twashyizeho gahunda yo kujya dutangira ubwisungane mu kwivuza abayobozi b’imidugudu kimwe n’izindi gahunda zose zijyanye na VUP zizajya zibageraho cyane ko bamwe muri mwe mwatangiye kuzibona”

Umunyamabanga nshingwabikorwa w’intara y’I Burasirazuba bwana Makombe we wanasabiye abayobozi babaye indashyikirwa mu kwesa imihigo kuba bazamurwa mu ntera, yijeje ubufatanye bw’intara ku nzego z’ibanze aho bazagerageza kubafasha muri imwe mu mihigo bazaba bafite imbaraga nkeya mu kuba bakwesa iyi mihigo.

Makombe ati “Ngewe ndashimira cyane abagore bo muri aka karere kuko urebye mu mirenge 12 igize aka karere mu myanya itatu hajemo imirenge iyoborwa n’abagore ubwo ni Console wa Gatore wabaye uwa mbere na Chantal wabaye uwa gatatu, birumvikana ko bakoze neza cyane kandi mu muco nyarwanda uwakoze neza aba akwiye guhembwa

Makombe kandi yagarutse kuburyo bayobozi babaye indashyikirwa bajya bazamurwa mu ntera ati “Nti muzi umuyobozi w’akagari umwe muri Ngororero wazamuwe akagirwa Visi meya? Impamvu se ni iyihe yindi usibye ko yakoze neza gusa? Ndasaba abagize nyobozi y’aka karere na meya ubahagarariye kureba uburyo aba bayobozi bahize abandi bajya bazamurwa mu ntera nka ba Gitifu bagashyirwa mu karere n’ubwo bagirwa aba diregiteri runaka kuko baba barakoze neza”

Akarere ka kirehe gaherutse kuza ku mwanya wa 16 mu mwaka ushize w’imihigo, gusa ku buyobozi bw’Aka karere n’intara y’I Burasirazuba bahamya ko uyu mwanya utari ukwiriye kuri aka karere gafite ubukungu ahanini bakomora ku kuba bahana imbibi n’ibihugu bibiri bikaba biba byoroshye muri gahunda z’ubucuruzi cyane ku bashoramari, ikindi kandi ubuhinzi bw’umuceri muri aka karere ni kimwe mu biba byagakwiye kubahesha amanota ahanini mu mihigo ijyanye n’ubukungu.

Twabibutsa ko imihigo igihugu cy’u Rwanda cyagendeyeho mu mwaka washize hatangwa amanota igabanije mu nkingi enye arizo, Ubukungu, Imiyoborere, Ubutabera n’Imibereho myiza y’abaturage, muri izi nkingi rero aka karere ka Kirehe kakaba kemeza ko mu bijyanye n’imibereho myiza ariho bakwiye gushyiramo imbaraga hibandwa cyane ku isuku ndetse no gukemura amakimbirane arangwa mu miryango. Kanzayire Console, Umunyamabanga Nsingwabikorwa w’Umurenge wa Gatore waje ku mwanya wa mbere mu kwesa imihigo y’umwaka ushize yashyikirijwe igihembo na Gitifu w’Intara
Meya w’akarere ka kirehe yagajejweho imihigo y’imirenge yose anashyiraho umukono Uyu muhango wari witabiriwe n’abanyacyubahiro batandukanye ku rwego rw’intara y’i Burasirazuba
Div Com. Generali Mubalaka Muganga nawe ari mu batangaga ibihembo

Yanditswe na Akayezu Jean de Dieu/MUHABURA.rw


Tanga igitecyerezo

Amazina
Ubutumwa

Izindi nkuru

Inkuru zikunzwe