Yashyizweho kuri25 March, 2019 | 09:48

Kenya yashimye uko ubucuruzi bwambukiranya umupaka bwateye imbere

Perezida wa Sena ya Kenya, Kenneth Lusaka aherekejwe na mugenzi we w’u Rwanda basuye imipaka ihuza u Rwanda na Repubulika Iharanira Demokarasi ya Kongo bishimira uburyo ubucuruzi bwambukiranya umupaka bukorwamo.

Aba bayobozi bagiriye uruzinduko mu karere ka Rubavu ejo hashize tariki 24 Werurwe 2019 aho basuye isoko mpuzamipaka riherereye ku mupaka muto (Petite Barriere), bareba urujya n’uruza rw’abantu, berekwa uburyo butandukanye bwashyizweho bufasha abakora ubucuruzi bwambukiranya umupaka bahanyura ari benshi; basuye kandi umupaka munini uhuza ibihugu byombi uzwi ku izina rya La Corniche, basura Gasutamo banareba serivisi zihatangirwa ibintu bemeje ko nibikorwa n’ibihugu byo mu karere bizazamura ubukungu mu buryo bwisumbuyeho.

Kenneth yashimye uburyo ubucuruzi bwambukiranya umupaka bwateye imbere, ndetse ngo uruzinduko rwe rwari rugamije gushimangira umubano no kwigiranaho ku bijyanye n’ubucuruzi barebeye ku bw’u Rwanda na DRC cyane kuri ‘One Stop Border Post’ .

Perezida wa Sena ya Kenya yagize ati: “Twaje nka Sena mu gusinya amasezerano yo kureba uko twanoza imikoranire, imihahirane, turimo kwigiranaho dushaka uko kwambukiranya imipaka byakorwa neza dufatanyije. Turashishikariza buri gihugu korosha ubucuruzi kuko bituma akarere gakura, nka Kenya dushaka gukomeza gushyira imbaraga mu byo twabonye ku Rwanda, twashimye ibikorwa birimo guhuza za Gasutamo uburyo buhuriweho n’ibihugu byombi ku mupaka uhuriraho abaturage benshi.

Makuza Bernard, Perezida wa Sena y’u Rwanda yashimye mugenzi we n’itsinda ryari rimuherekeje ndetse ashimangira ko uru ruzinduko rugiye kugira icyo byungura ibihugu byombi ndetse n’urwego rwa Sena rw’ibihugu byombi.

Agira ati: “Baje mu rwego rw’ubucuti busanzwe bimwe mu bintu byabazanye harimo kuba tugiye gusinya amasezerano ku butwererane, barebye uko ibintu bikorwa mu Rwanda by’umwihariko ku mupaka uhuza u Rwanda na Congo, nubwo Congo itaba mu muryango w’ibihugu by’Afurika y’Iburasirazuba imipaka yacu ni urugero rwiza rwo kwigirwaho.

Akomeza agira ati: “Ni umugisha kugenderana hagati y’ibihugu byacu kuko byongera byinshi bituma n’abaturage bagira ikizere cyane ko babona ko ubuhahirane buri mu ngeri zose z’igihugu bigahera ku kuba, abakuru b’ibihugu hari ibyo bakora natwe ni intera nka Sena kuba twakongera ku mikoranire.”

Isoko mpuzamipaka ryasuwe ryuzuye ku nkunga ya Trade Mark East Africa yashoyemo miriyoni 3 z’amadorari, umupaka muto unyuraho abasaga ibihumbi 55 by’abambukiranya umupaka, umupaka munini La Corniche unyuraho abasaga ibihumbi 8, Magerwa ikoreramo serivisi zitandukanye zirimo n’iz’ubuziranenge, ububiko n’ibindi.

JPEG - 313.8 kb
Perezida wa Sena y’u Rwanda Bernard Makuza (ibumoso) na mugenzi we wa Kenya, Lusaka Kenneth hagati basobanurirwa n’uhagarariye abinjira n’abasohoka mu Ntara y’Iburengerazuba uko ubuhahirane bukorwa

Chief editor /MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru