Yashyizweho kuri6 December, 2016 | 18:33

Kayonza : Umushinga PASP Ugiye gufasha abahinzi borozi ku buryo bwihariye

Binyuze mu mushinga wa Minisiteri y’Ubuhinzi n’Ubworozi , PASP Ushinzwe gufata neza umusaruro, kowongerera agaciro no kuwugeza ku isoko, MINAGRI ivuga ko igiye gukemura burundu ikibazo cy’abahinzi n’aborozi bagitinya gukorana n’ibigo by’imari

Ibi byagarutsweho kuri uyu wa 06 Ukuboza 2016 ubwo abahagarariye uyu mushinga bagiranaga ikiganiro n’abikorera, Abayobozi batandukanye ku rwego rw’Akarere ka Kayonza ndetse n’abayobozi b’ibigo by’imari muri aka karere.

Abahagarariye ibigo by’imari muri aka karere ka Kayonza basanga uyu mushinga wa Minisiteri y’Ubuhinzi n’Ubworozi ushinzwe gufata neza Umusaruro, kuwongerera agaciro no kuwugeza ku masoko uzafasha cyane ibigo by’imari ndetse ukaba ugiye guhindura imibereho y’abahinzi cyane cyane bamwe baba bafite imitekerereze myiza yo kwivana mu bukene

Nikuze Donathile umwe mu bayobozi b’ibigo by’imari waganiriye na MUHABURA.rw uvuga ko uyu mushinga ufasha cyane abahinzi n’aborozi gusa agaragaza nanone ko zimwe mu mbogamizi ari uko abaturage iyo bumvishe aya mafaranga bagirango ni ayo gukoresha muzindi nyungu

Ati “Uyu mushinga ufasha neza abahinzi cyane ko niba twebwe tubahaye inguzanyo kandi bagomba kuyishyura yose ndetse bashyizeho n’inyungu ariko PASP yo icyo ifasha aba bahinzi n’aborozi bafite imishinga yemewe na Bank ndetse na BDF ibaha inkunga ya 40% yayo baba bagomba kwishyura Bank”

Nkaba rero nakangurira abashora imari mu buhinzi kujya bagerageza gutanga imishinga yabo ku bigo by’imari hanyuma niyemerwa bahabwe inkunga n’Umushinga PASP”

Ku ruhande rwa BDF isanzwe ifite guteza imbere ba rwiyemezamirimo baciriritse by’umwihariko abagore n’urubyiruko ivuga ko bazakorana neza n’uyu mushinga wa PASP cyane ko bari basanzwe bakorana neza n’ibigo by’imari nk’uko bisobanurwa na Sam Mwendo ushinzwe ubujyanama mu by’ubucuruzi muri BDF mu karere ka Kayonza

SAFARI Steven, Umuyobozi w’Urugaga rw’Abikorera mu karere ka Kayonza avuga ko n’ubwo hakiri imbogamizi muri ba rwiyemezamirimo bakorera muri aka karere ariko uyu mushinga bawubona nk’igisubizo cyane kuri bamwe bashora imari mu bikorwa bijyanye n’Ubuhinzi.
SAFARI Steven, Umuyobozi w’Urugaga rw’Abikorera mu karere ka Kayonza avuga ko Uyu mushinga ari igisubizo kuri bo

Steven ati “Uyu mushinga uzacyemura cyane ibibazo bikunze kugararagara muri ba rwiyemezamirimo cyane bamwe bagitinya gushora imari mu buhinzi n’ubworozi kuko sinumva ko umaze kumva uburyo Leta izajya ikwishyurira amafaranga angana na 40% ntago waba ukigize ubwoba ngo uzahomba ngwee ndumva bitanashoboka guhomba rwose

Ikindi kandi ni uburyo bwiza bwo guteza imbere ubuhinzi n’ubworozi kuko hagiye kuboneka benshi babushoramo imari bityo n’abakora uwo mwuga w’ubuhinzi ubushobozi bwabo bubashe kuzamuka ku rundi rwego”

SAFARI Steven kandi akomeza agaragaza ko kuri we abona BDF nk’umujyanama , Bank nk’umufatanya bikorwa ndetse na PASP nk’umuterankunga .
ZIGIRIZA Lucia Umuyobozi mukuru w’Uyu mushinga wa PASP ku rwego rw’igihugu,Asobanurira aba bakozi b’ibigo by’imari, abikorera n’abayobozi imikorere ya PASP

ZIGIRIZA Lucia Umuyobozi mukuru w’Uyu mushinga wa PASP ku rwego rw’igihugu Asobanura ko uyu mushinga ufasha cyane abahinzi n’aborozi cyane ko uzajya afata inguzanyo azajya yishyurirwa amafaranga angina na 40% by’ayo yafashe muri bank

Lucia Ati “Umushinga wa PASP Ugamije kuzamura ubushobozi bw’umuntu wese ushora imari mu buhinzi n’ubworozi, aha tukaba dutera inkunga mu makusanyirizo, mu bigega byo guhunikamo, tugafasha abahinzi n’aborozi kubaka aho guhunika, aho gusarurira, amakusanyirizo y’Amata mbese urazi neza ko umusaruro w’umuhinzi mworozi utabashaga gufatwa neza ariko nta kindi uyu mushinga umaze ni ukorohereza aba bahinzi borozi mu gufata neza ibyo basarura”

Ati “Ubusanzwe umuntu azajya yishyura amafaranga 60% by’ayo yagujije muri bank hanyuma n’Umushinga PASP Umwishyurire agera kuri 40% gusa nanone ibi bizajya biba kuri ya mishinga yemerewe inguzanyo, bivuze ngo abahinzi n’aborozi barasabwa mbere na mbere kumanza gukorana n’ibigo by’imari hanyuma natwe tukabona ya mishinga yemewe n’ibigo by’iamri ndetse ikanaterwa inkunga na BDF, Uwo mushinga natwe nutugera imbere rwose tuzawushyigikira”

Uyu mushinga wa PASP wateguwe na Minisiteri y’Ubuhinzi n’Ubworozi ukaba ugamije neza umusaruro, kowongerera agaciro no kuwugeza ku isoko, kugeza uyu munsi wa none ukaba umaze kugezwa mu turere 12 Tw’u Rwanda harimo uturere 5 two mu ntara y’I Burasirazuba, Uturere 4 two mu ntara y’Amajyepfo ndetse na Musanze mu ntara y’Amajyaruguru hakaba hamaze guterwa inkunga imishinga igera muri 43 ndetse ijyanye n’Ubuhinzi n’Ubworozi. Bamwe mu bayobozi bitabiriye ibi biganiro byabahuje Abakozi ba PASP ZIGIRIZA Lucia Umuyobozi mukuru w’Uyu mushinga wa PASP ku rwego rw’igihugu

Yanditswe na Akayezu Jean de Dieu/MUHABURA.rw


Tanga igitecyerezo

Amazina
Ubutumwa

Izindi nkuru