Yashyizweho kuri29 December, 2016 | 16:49

Karongi: Inkongi yibasiye imiryango itatu y’ubucuruzi

Twagirimana Aphrodis, Kamikazi Patience na Habyarimana Emmanuel, abacuruzi mu isantere ya Birambo, bararirira mu myotsi, nyuma y’uko amaduka yabo yibasiwe n’inkongi y’umuriro igakongora ibicuruzwa byabo byose.

Aba bacuruzi bakorera mu mudugudu wa Birambo, akagari ka Birambo, umurenge wa Gashali mu karere ka Karongi, bavuga ko batanzi inkomoko y’iyi nkongi y’umuriro, n’ubwo bakeka ko yaba yatewe n’amashanyarazi.

Kamikazi Patience ni umwana w’umukobwa wari ukirangiza kwiga atangiye gucuruza, dore ko yari amaze ibyumweru bibiri aje gucururiza muri iyi santere, yacuruzaga ibiribwa n’ibinyobwa muri kantine avuga ko yari ifite agaciro k’ibihumbi 50.
yagize ati “Ndakeka ntawagiraga ubwishingizi, nta kintu naramuye usibye telemusi, nabuze telefone nari nacaginze, imyenda yo kwambara, agafuka karimo amafaranga… ntikije nk’ibintu by’ibihumbi 50”.

Yasobanuye ko bari mu nama y’abaturage, igiye kurangira yohereza umukozi we ngo abe agiye aho bacurizaga, uwo mukozi yakingura agasanganirwa n’umwotsi, agasubirayo kubivuga bagatangira kuzimya.

Yagize ati “Turakeka ko habayeho sirikwi ifatiye kwa Twagirimana Aphrodis wahise agwa muri koma ubu akaba ari kwa muganga, dore ko we yacuruzaga butike irimo ibintu byinshi akaba yaramuyemo injerekani gusa.

Umuvugizi wa Polisi mu ntara y’Uburengerazuba CIP Kanamugire Theobard, avuga ko ku mugoroba w’itariki 28 Ukuboza 2016 ahagana saa 16h00, ari bwo imiryango itatu y’ubucuruzi yafashwe n’inkongi y’umuriro, ariko nawe ahamya ko icyayiteye kitaramenyekana.

Yagize ati “Inzu y’ubucuruzi y’ibyumba bitatu yafashwe n’inkongi irashya ariko abantu bagerageje kuzimya bakuramo ibintu bikeya, ntituramenya agaciro k’ibyangiritse n’icyateye iyo nkongi iperereza rirakomeje.
Haracyekwa ko ari intsinga z’amashanyarazi zaba zabiteye, ariko ibyo sinabihamya gusa turacyakurikirana ngo tumenye ibyo ari byo.”

Uyu muyobozi yakomeje avuga ko inkongi y’umuriro nk’iyi kimwe n’ibindi biza bidateguza, agasaba abacuruzi ko bagira ubwishingizi bw’ibicuruzwa byabo, bakajya banareba ko inzu zabo zashyizwemo amashanyarazi n’abakozi babifitiye ubuhanga n’ubushobozi.

Kamikazi yavuze ko ibi byago bagize bibasubije hasi, ku buryo ngo kuzongera kubona ubushobozi bwo gutangiza ubucuruzi bizabafata igihe kitari gito.

Muhabura.rw


Tanga igitecyerezo

Amazina
Ubutumwa

Izindi nkuru