Yashyizweho kuri17 July, 2017 | 08:37

Karongi : Ikibazo cy’ubushomeri gituma ntacyo bigezaho

Abayobozi b’Akarere ka karongi baratangaza ko uyu mwaka w’ingengo y’imari uzarangira muri ako Karere hahanzwe imirimo mishya idashingiye kubuhinzi mu rwego rwo kwihutisha iterambere ry’abaturage.

Akarere ka Karongi karagaragaza uwo muhigo mu gihe hakomeje kumvikana amajwi y’abaturage b’ako Karere biganjemo urubyiruko bagaragaza ko bugarijwe n’ikibazo kibakomereye cy’ubushomeri butuma ntacyo bigezaho.

Muri aka Karere, ubabona abaturage bamwe biyicariye ntacyo bakora mu gihe bagenzi babo bari ku murimo.

Mbabazi FRANCOIS umuturage wo mu murenge wa Rubengera , akagari ka Gacaca, yabwiye muhabura.rw ati “Muby’ukuri nk’urubyiruko natwe dushaka iterambere ariko dukomwa mu nkokora no kuba nta mirimo tubona; twakabaye duhinga ariko amasambu nayo yarashize, ubu dutegereje icyo ubuyobozi buzadufasha.”

Sibomana Alex, umuhinzi wo mu Murenge wa Mubuga we agira ati “Guhinga kw’iki gihe nabyo ni amaburakindi; imirima yadushizeho[kubera abana] n’akarima gato umuntu aba afite usanga katera neza (…) buriya Leta yadufasha tukabona ibindi dukora.”

Bashonje bahishiwe’

Ku ruhande rw’abayobozi b’Akarere ka Karongi bugaragaza ko abaturage badafite imirimo ‘bashonje bahishiwe’ kubera ko ngo hagiye kuboneka imirimo mishya idashingiye kubuhinzi izakura abaturage benshi mu bukene kandi imyinshi yaratangiye.

Umuyobozi w’Akarere ka Karongi Ndagijimana Francois , akaba avuga ko imirimo ihangwa haherewe ku mahirwe ari mu Karere hibandwa ku bagore n’urubyiruko.

Yagize ati: “Turi kwibanda ku rubyiruko n’abategarugori; turi kubigisha imyunga kugira ngo bagende bahangane ku isoko ry’umurimo (…) dufite na gahunda ifasha abo twahuguye kubona ibikoresho bijyanye n’ibyo bize.”

Umuyobozi w’Akarere ka Karongi Ndagijimana Francois , akomeza avuga ko “Niba warize gusudira ugakenera post-á-souder icyo gihe uraza tukaguhuza na SACCO ikaguha icyo gikoresho ukazishyura cya gikoresho nyuma, akenshi usanga umuntu yishyura 50% andi Leta ikazayakwishyurira.”

Yanditswe na Ruhumuriza Richard/Muhabura.rw


Tanga igitecyerezo

Amazina
Ubutumwa

Izindi nkuru