Yashyizweho kuri14 December, 2018 | 15:32

Bamporiki yavuze ku mazina y’amagenurano atangaje ari mu muryango we n’impamvu bayiswe

Perezida w’Itorero ry’Igihugu, Bamporiki Edouard yatangaje uburyo abakoloni basenye ubumwe n’indagaciro by’abanyarwanda kugeza ubwo batangiye kuvangirwa bakabura icyerekezo no mu mazina bitaga abana babo.

Mu 1894 nibwo abakoloni baje mu Rwanda, kuva ubwo byose birangirika kugera mu 1994 ubwo Jenoside yakorewe Abatutsi yabaga.

Bamporiki yavuze ko gahoro gahoro inyigisho z’abakoloni zatangiye gucengera mu banyarwanda, bigera no mu muco wo kwita amazina aho kwita agaragaza ubutwari batangira kwita ayifuza.

Ati “Abakurambere batangiye kubaka igihugu, babyaye ba Mitsindo, ba Murindabigwi, ba Turikunkiko, ba Mutwarasibo, ba Mukaragandekwe, ba Ruhamanya, Rutikanga, Ntabwoba. Abakoloni n’abanyamadini bamaze kuhagera, ibintu bitangira guhinduka bivanga abantu, batangira kuvuga ngo Habimana, Hakorimana, Harerimana , Hakizimana, Hategekimana.

Bitangira kuva kuri bo, inshingano bari bafite batangira kuzishyira ku Mana ko bazategereza uko izabigenza.”

Bamporiki yavuze ko uko imyaka yagendaga yicuma, umuco wakomeje gusenyuka noneho abanyarwanda batangira kuvangirwa hakaba ubwo babuze n’amazina bita abana babo.

Ati“Indangaciro z’abakurambere bacu zari ubuzima, zari umuco. Itorero bamaze kurica indangaciro zaracitse, itorero risigarana akantu kamwe ko kubyina. Intore yo yagize ibibazo kuko umuntu yishingiye itabi aryita Intore. Ibintu byose byo mu Rwanda byarakinishijwe.”

Yahereye mu muryango we, yerekana uburyo amazina yiswe mu gihe indangaciro nyarwanda zari zarasenywe nta ntego yari afite.

Ati “Nganira na Sogukuru witwaga Habimana, naramubajije nti ‘ko Data ujya kumwita wamwise izina rimeze nk’iririmo ikibazo.Arambwira ati ‘byari byamaze kwivanga bariya bantu bari baduteranyije mbura izina’.Data yamwise Mwitende.

Yunzemo ati“Aya mazina ngiye kuvuga nta n’umwe tudafite icyo dupfana nibura kugera kwa Sogokuru. Hari Mwitende, Ndimubanzi, Nzabarankize, Nzabakirana,Zikamanwabanzi, Rwango, Mbarimombazi, Mpozenzi, Bandorayingwe, Bapfakurera, Nzihorera na Bamporiki.

Yavuze ko icyo gihe abanyarwanda bitaga amazina bagendeye uko bameze nuko biyumva kurusha icyo bifuriza umwana n’icyo bashaka ko ageraho.

Bamporiki avuga ko nyuma y’urugamba rwo kubohora igihugu, imyitire y’amazina yahindutse, byerekana uburyo indangaciro z’abakurambere zongeye guhabwa umwanya.

Ati “Dufatiye wenda mu 1995, abana bavutse ni Gihozo, Cyuzuzo, Ganza, Shimwa, Sheja, Teta, Keza , Gaju, Gasaro, Karabo na Shami.”

Itorero ry’Igihugu ryagaruwe mu Rwanda mu mwaka wa 2008 nyuma yo gucibwa n’abakoloni mu 1924 ribasha kugira bimwe rigenda rigarura byari byaracitse ndetse rikaba rikomeje umurego mu gusubizaku murongo indangagaciro z’abanyarwanda zabarangaga mbere y’abakoloni.

MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru