Yashyizweho kuri17 October, 2018 | 18:12

Abahinzi barataka igihombo baterwa no guhinga urwanyuma bitewe no kubura imbuto n’inyongera musaruro

Minisiteri y’ubuhinzi n’ubworozi iravuga ko nta muhinzi uzongera kubura imbuto n’ifumbere cyangwa ngo bimugereho bitinze.Uru rwego rutangaza ibi mu gihe hari abataka kubura inyongeramusaruro hirya no hino mu gihugu bakomeje kwiyongera,kandi ko bitubya umusaruro wabo.

Bamwe mu bahinzi bataka igihombo no guhungabana k’umusaruro wabo , ngo babiterwa ahanini no kutabonera igihe imbuto n’ifumbire rimwe na rimwe bakanabibura burundu.

Abaganiriye na Muhabura.rw bavuga ko aho ikibazo gikomereye, ari uko aho bakabaye bakura iyi nyongeramusaruro itakiharangwa, bigatuma batera imirima yabo urusorongo.

Umwe yagize ati“Nk’ubu aho ihinga rigeze turazibura(imbuto) n’ayo ma fumbire tukayabura,none duhinze ibyanyuma bitari ngombwa.”

Undi nawe akomeza agira ati“Umwe atera uyu munsi, undi atere mu kindi cyumweru,ubwo se muzasarurira rimwe? Ikibazo ni uko aho kuyigurira(ifumbire) ntaho”.

Kuba bimeze uku babivuga hano, biraca amarenga ko mu minsi iri imbere kubona icyo kurya kuri iyi miryango y’abahinzi bitazoroha na gato.Icyakora imvugo y’umunyamabanga wa leta muri minisiteri y’ubuhinzi n’ubworozi bwana Nsengiyumva Fulgence iratanga ikizere ku bahinzi.

Umunyamabanga wa leta muri minisiteri y’ubuhinzi n’ubworozi bwana Nsengiyumva Fulgence yijeje abahinzi ko hari imbuto nyinshi kuburyo icyumeru gitaha bazaba basoje ihinga

Nsengiyumva yagize ati”Rwose ndababwiza ukuri ko hari imbuto nyinshi zakorewe mu gihugu,kuburyo duteganya ko icyo kibazo kizacika.Abaturage bo ku byerekeranye n’ifumbire hari uruganda rugiye kuzajya ruyikorera hano mu gihugu n’ubwo rutari rwatangira ariko yo twakoze kuburyo iboneka kugihe ubu ba rwiyemeza mirimo bazigeza ku bacuruza inyongera musaruro, barabikoze”.

Uyu muyobozi yakomeje avuga ko icyerekeranye n’imbuto cyo cyakemutse kuburyo mu cyumweru gitaha abahinzi bazaba barangije gutera.

Ati”Rwose nabizeza ko ubu ngubu imbuto zihari.Turimo turakangurira abahinzi,ubwo imvura yaguye y’uko nibura bitarenze icyumweru gitaha bose baba barangije gutera”.

Kubura no gutinda kw’imbuto n’ifumbire bivugwa hirya no hino mu gihugu, abahinzi bakomeje kutabyishimira kuko byatumye batabona umusaruro ukwiye.Amakuru atangwa na ministeri y’ubuhinzi n’ubworozi ashimangira ko bafashe ingamba zo gukemura ibibazo by’imbuto n’inyongeramusaruro byavugwaga mu gihugu, aho ngo leta yashyizeho politiki yo gutuburira imbere mu gihugu imbuto, kuburyo 50% by’imbuto zizahingwa mu mugihembwe cy’ihinga 2019 A zizatuburirwa mu Rwanda.

Ibi bitandukanye n’uko byatumizwaga hanze bigahenda leta ndetse n’umuhinzi ntabibonere igihe nk’uko abifuza.

Honore Ishimwe/MUHABURA.RW


Tanga igitecyerezo

Amazina
Ubutumwa

Izindi nkuru

Inkuru zikunzwe