Yashyizweho kuri22 February, 2017 | 09:42

Abadepite bemeje itegeko rishyiraho amahoro ku bicuruzwa byatumijwe mu mahanga agenewe(AU)

Abadepite bemeje ishingiro ry’umushinga w’itegeko rishyiraho amahoro ku bicuruzwa byatumijwe mu mahanga, agenewe ibikorwa by’Umuryango wa Afurika Yunze Ubumwe (AU).


Uyu mushinga nuba itegeko, uzatuma guverinoma ibasha gukusanya agera kuri miliyari 1.5 Frw burimwaka agenewe gushyikigira ibikorwa bya AU, hagamijwe ko yishakamo ubushobozi aho gushingira ku nkunga z’abanyamahanga.

Uyu ni umwe mu myanzuro ikomeye yafatiwe mu nama y’Abakuru b’Ibihugu na za Guverinoma bigize Umuryango wa Afurika Yunze Ubumwe, yabereye i Kigali muri Nyakanga 2016 hagamijwe impinduka, nyuma y’igihe kinini ibikorwa bya AU bigendera ku nkunga z’amahanga ku kigero cya 76% ndetse Umuryango w’abibumbye ugashyira andi menshi mu bikorwa by’amahoro.

Inkunga nyinshi zifasha AU ziva mu bihugu byo mu Burengerazuba bw’Isi no mu Bushinwa.

Muri aya mavugurura yemerejwe i Kigali, biteganywa ko AU nibura nigenda yakira 0.2 % by’amahoro y’ibitumizwa mu mahanga kuri buri gihugu kiyigize, umubare ugereranyije w’amafaranga akomoka kuri ayo mahoro uzagera miliyari $1.2, ni ukuvuga asaga miliyari 890 Frw.

Ubwo yasobanuriraga abadepite impamvu z’uyu mushinga, Minisitiri w’Imari n’igenamigambi, Gatete Claver, yavuze ko abakuru b’ibihugu bemeranyije ko 75% yajya muri ibyo bikorwa naho 25% akajya mu bikorwa byo kubungabunga amahoro n’umutekano.

Yagize ati “Uyu mubare w’amafaranga uzakusanywa n’Ikigo cy’igihugu gishinzwe imisoro n’amahoro, abanze ghushyirwa muri Banki Nkuru y’igihugu mbere y’uko yoherezwa mu bubitsi bwa AU.”

Biteganywa ko ayo mahoro azajya yakirirwa kuri za gasutamo hakurikijwe amategeko agenga imisoro, ugashyirwa kuri konti yafunguwe muri Banki Nkuru y’Igihugu.

Minisitiri Gatete yavuze ko u Rwanda rugomba gushyira imbere iyi gahunda kuko yatangijwe kandi ikayoborwa na Perezida Paul Kagame, anashimangira ko ibintu byose bizakurwaho ayo mahoro, keretse ibikorerwa muri Afurika y’Iburasirazuba n’ibindi bidasoreshwa birimo inyongeramusaruro, imbuto, imashini zo mu nganda, ibikoresho byo mu buvuzi, n’ibindi.

Uyu mushinga w’itegeko ugomba gukomeza gusuzumwa na Komisiyo ishinzwe ingengo y’imari n’umutungo by’igihugu, mbere y’uko ugezwa imbere y’inteko rusange ngo wemezwe.

Kuva kuwa 1 Mutarama 2017 biteganywa ko AU izakoresha ingengo y’imari ya $1167 046, arimo $ 886 246 agize ingengo y’imari y’imirimo isanzwe na $280 800 agenewe Ikigega cyo kubungabunga amahoro.

Mu mavugurura akenewe muri AUPerezida Kagame yagejeje ku nama ya 28 y’Umuryango wa Afurika yunze Ubumwe yateraniye Addis Ababa muri Mutarama, Perezida Kagame, yavuze ko iyo misanzu yasuzumwa neza hakarebwa n’ubushobozi bwo kwishyura bwa buri gihugu, kandi komite ya ba Minisitiri b’imari 10 ikajya ireberera ingengo y’imari y’umuryango, bakagena n’amabwiriza ikoreshwamo.

Umukuru w’Igihugu yavuze ko ibikorwa bya AU uyu munsi biterwa inkunga kugeza kuri 97% kandi ugasanga ibihugu byinshi bitihutira gutanga imisanzu yabyo, kandi “iyo ari wowe utanga amafaranga, unahangayikishwa no kubona umusaruro ungana n’ayo watanze.”
Minisitiri Gatete yavuze ko u Rwanda rugomba gushyira imbere iyi gahunda kuko yatangijwe kandi ikayoborwa na Perezida Paul Kagame

Yanditswe na Muhabura.rw


Tanga igitecyerezo

Amazina
Ubutumwa

Izindi nkuru