Yashyizweho kuri20 June, 2019 | 17:12

Rutahizamu watsinze ibitego 14 muri shampiyona y’u Rwanda yegukanwe na Rayon Sport

Rutahizamu Yannick Bizimana washakishwaga n’amakipe atandukanye mu Rwanda arimo APR FC na Police FC, yegukanwe na Rayon Sports kuburyo yanamaze no gushyira umukono ku masezerano y’imyaka ibiri ayikinira.

Kwitwa rutahizamu uyu musore arabikwiriye dore ko yatsindiye ikipe yakiniraga ya AS Muhanga ibitego 14 muri shampiyona y’u Rwanda bituma amakipe akomeye amwifuza ariko birangiye yerekeje muri Gikundiro.

Uyu rutahizamu yatangajwe nk’umukinyi wa Rayon Sports kuri uyu wa Kane binyuze ku rukuta rwa Twitter rw’iyi kipe.

Hagira hati “Yannick Bizimana yemeye amasezerano yo gukinira Rayon Sports mu gihe cy’imyaka ibiri. Uyu rutahizamu w’umunyarwanda ukiri muto yatsinze ibitego 14 mu 2018-19 akinira AS Muhanga. Yasinyiye Gikundiro nyuma yo kwitwara neza muri shampiyona y’u Rwanda mu mwaka ushize.”

Uyu musore yerekeje mu ikipe ya AS Muhanga mu 2017-18 nyuma yo gutizwa na Gitikinyoni FC yo mu cyiciro cya kabiri.

Mu makipe yamushakaga bivugwa ko harimo APR FC yamukurikiranye cyane nyuma y’uko ayitsinze ibitego bibiri mu mukino wa shampiyona.

Ibiganiro byabereye mu Mujyi wa Muhanga ntacyo byaje kugeraho dore ko uyu musore we yifuzaga kubona ikipe yabonamo umwanya uhoraho wo gukina ndetse abanzamo.

Gusa hari amakuru ahwihwiswa avuga ko tariki ya 9 Kamena, abayobozi ba Police FC bahuye n’uyu mu ibanga rikomeye n’uyu musore akemera gusinya imbanzirizamasezerano y’imyaka ibiri nyuma yo guhabwa miliyoni 2.5 Frw ndetse n’umushahara w’ibihumbi 300 by’amafaranga y’u Rwanda.

Gusa AS Muhanga biciye kuri Perezida Ndayisaba Damascène ndetse n’umutoza wayo Abdou Mbarushimana, bagiranye ibiganiro na bamwe mu bayobozi ba Rayon Sports bifuza ko uyu ruyahizamu yakwerekeza muri Rayon Sports mu gihe baba bishyuwe miliyoni eshanu nk’ikiguzi cy’umwaka Yannick asigaranye muri iyi kipe, maze nabo bagaha Rayon Sports urupapuro rumurekura.

Magingo aya umu mukinnyi abaye uwa kane usinyiye iyi kipe y’ubururu n’umweru cyangwa Gikundiro nk’uko bayibatije aho yiyongereye ku munya-Ghana witwa Commodore Olokwei,Ndizeye Samuel wavuye muri Vitalo, Iragire Saidi wavuye muri Mukura VS ndetse na Runanira Hamza waturutse mu ikipe ya Marines FC.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru