Yashyizweho kuri24 July, 2019 | 10:17

Robertinho yasesekaye i Kigali aje gukomeza imirimo ye yogutoza Rayon Sports

Umunya-Brésil Roberto Oliveira Gonçalves do Carmo uzwi cyane nka Robertinho umutoza wari uwa Rayon Sports,mu rukererera rwo kuri uyu wa Gatatu yasesekaye ku kibuga mpuzamahanga cy’indege cya Kigali agarutse muri iyi kipe.

Robertinho yakiriwe na Itangishaka Bernard King uherutse kugirwa Umuyobozi Nshingwabikorwa wa Rayon Sports wari kumwe na Karenzi Alex uhagarariye inyungu z’uyu mutoza hamwe n’abandi bafana bake.

Yafashije Rayon Sports gutwara igikombe cya shampiyona cy’umwaka ushize w’imikino ariko haza kubaho ikibazo cy’uko ibiganiro byo kongererwa amasezerano bitagenze neza hagati ye n’ubuyobozi bityo akaba aje kongera gutoza iyi kipe ndetse ahashyire n’umukono ku masezerano y’umwaka umwe.

Mu kiganiro yagiranye n’itangazamakuru akigera i Kigali,yavuze ko yiteguye kongera kubaka ikipe nshya no gukorana n’abatoza bashya barimo Kirasa Alain wahoze ari umutoza wa Kiyovu Sport waraye asinyiye kuzamwungiriza.

Robertinho ati" Hari abandi bakinnyi bashya, birasaba gutekereza neza kugira ngo hakinishwe abakinnyi bakwiriye kujya mu kibuga. Ndi hano kugira ngo nongere ntange ibyo mfite byose. Namaze kubona urutonde rw’ abakinnyi bazakina Champions League ariko siyo gusa tugomba kureba n’indi mikino.”

Yakomeje agira ati “Si ikibazo kuri njye kuba nakubaka ikipe nshya kuko no mu gihe cyashize narabikoze. Rayon Sports ni ikipe ikinira gutwara igikombe. Umutoza wese utoza muri Rayon Sports aba agomba kumenya ko ari ugutsinda buri mukino."

Uyu mutoza yari yasubiye iwabo mu ntangiriro z’ukwezi gushize nyuma y’uko ibiganiro byo kongera amasezerano hagati ye na komite yari iyobowe na Muvunyi Paul ntacyo bigezeho.

Yagiye adatoje igikombe cy’Amahoro, ikipe isigaranwa n’uwari umutoza wungirije Wagner do Nascimento Silva wayigejeje muri ½ cy’iri rushanwa, gusa na we ntiyatoza umukino wo guhatanira umwanya wa gatatu kuko watojwe na Mwiseneza Djamali anabasha kuwegukana.

JPEG - 58.3 kb
Robertinho ku kibuga cy’indege yakiriwe n’Umuyobozi Nshingwabikorwa wa Rayon Sports Itangishaka King Bernard


Chief Editor/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe