Yashyizweho kuri11 October, 2019 | 06:57

Kigali: Didier Drogoba yagaragaje uburyo afata u Rwanda nk’ikitegererezo

Mu nama y’Ihuriro Nyafurika ry’Urubyiruko ikomeje kubera mu Rwanda, ku munsi wa kabiri wayo umwe mu byamamare mu mukino w’umupira w’amaguru Didier Drogba, yavuze ko mu myaka 25 ishize u Rwanda rwungutse imbaraga zidanzwe, ibintu avuga ko byamwubatse mu buzima bwe.

Ibyo bikubiye mu buhamya Drogba ukomoka muri Côte d’Ivoire yatangiye mu Ihuriro Nyafurika ry’Urubyiruko ‘Youth Connekt Africa’ rihuje urubyiruko rusaga 4.500 baturutse mu bihugu bitandukanye by’Afurika byiganjemo ibivuga ururimi rw’Icyongereza

Drogba asanga u Rwanda rwarateye intambwe ifatika irebana no guharanira kongera kwiyubaka no gushishikariza Abanyarwanda gukomeza kwiyunga, bakarenga ibibatanya kandi ngo byose byashobotse kubera ubuyobozi bwiza.

Ati “Muri 2009 naje gusura u Rwanda, ngarutse nasanze hari impinduka ikomeye nyuma y’ibyabaye mu gihugu cyanyu. U Rwanda rwungutse imbaraga zidasanzwe zo kongera kubaka Igihugu, kuko rwagize imbaraga zidasanzwe kandi natwe mu gihugu cyacu mu bibazo twigeze kugira byaranyubatse.

Mwebwe nk’urubyiruko rw’Afurika mugomba guca ukubiri n’uwabaca intege ariko mugaharanira gukora ibyo mwifitemo nk’umuhamagaro cyangwa impano kandi ukabibyaza umusaruro kabone n’iyo wahura n’ibicantege.”

Akomeza agira ati “Amasomo nize ku Rwanda yambereye isomo kuko u Rwanda rwambereye ikitegererezo n’urugero rwiza.” Aha, agaragaza uburyo yatanze umusanzu mu kuzana amahoro n’ituze mu gihugu akomokamo, hari mu mwaka wa 2006, kuko we n’abandi bagenzi be, yasabye impande zari zishyamiranye mu gihugu ke kubana mu mahoro bagahagarika amakimbirane n’intambara barimo kandi yishimira ko byagezweho.

Mu kiganiro yatanze gikubiyemo ubuhamya bwe burebure bwagarutse ku buzima bwe mu rugendo rw’umupira w’amaguru yatangiye akiri umwana muto w’imyaka 19, yagiriye inama urubyiruko rw’Afurika kwibanda no gukora ibyo rwumva rukunda.

Yagarutse ku ngero uburyo yasize umwe mu babyeyi be muri Côte d’Ivoire, agakomereza mu gihugu cy’u Bufaransa, aho yakinnye akavayo ajya mu Bwongereza mu ikipe ya Chelsea yagiriyemo imigisha kandi ni bimwe mu byamugejeje ku kubaka izina no kugera ku nsinzi agakina umupira bya kinyamwuga nubwo yagiye ahura n’imbogamizi zirimo kuvunika agatsinsino bikomeye.

Ati “Nyuma y’ibyo bibazo byose sinagamburujwe ahubwo nagumye ku ntego yange ijyanye n’umuhamagaro nahisemo wo gukina umupira w’amaguru kandi inzozi zange zabaye impamo nkomeza kwigirira ikizere.”

Drogba ari mu Rwanda, ahaje ku nshuro ya kabiri kuko yahaherukaga mu 2009, yagize uruhare mu gutanga umusanzu we mu mushinga ‘One dollar campaign’ wo kubakira abana batagira amacumbi barokotse Jenoside yakorewe Abatutsi mu Rwanda.

JPEG - 69.5 kb
Umukinnyi w’umupira w’amaguru Didier Drogoba wo muri Cote d’Ivoire ari mu nama y’Ihuriro ry’Urubyiruko irimo kubera mu Rwanda

Chief editor/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru