Yashyizweho kuri29 June, 2017 | 09:03

Itariki yo guhabwa igikombe ku ikipe ya Rayon Sport yamenyekanye

Rayon Sports yegukanye igikombe cya shampiyona cya 2016/17 kugeza ubu ntiragihabwa gusa abakunzi bayo bagomba gutegereza tariki 8 Nyakanga 2017 kugira ngo bagishyikirizwe nyuma y’umukino wa gishuti uzayihuza na Azam FC yo muri Tanzania.

Rayon Sports yegukanye igikombe isigaje imikino ine ngo shampiyona irangire gusa uwo yagombaga gukinira imbere y’abafana bayo wari uwa APR FC ari nawo yasabye ko yahererwaho igikombe, Ferwafa ikabyanga ivuga ko izakiyiha ku mukino wa nyuma yagombaga gusuramo Kiyovu Sports ku Mumena nayo maze nayo irabyanga.

Uku kutumvikana kwatumye shampiyona irangira bwa mbere mu mateka y’umupira w’amaguru mu Rwanda nta gikombe gitanzwe byemezwa ko nyuma hazategurwa umukino wa gishuti aribwo Rayon Sports izahabwa igikombe cyayo.

Ferwafa na Rayon Sports bemeranyijwe ko batumira ikipe ya Azam FC y’umuterankunga wa shampiyona y’u Rwanda, AZAM LTD, ndetse nk’uko tubikesha ibitangazamakuru byo muri Tanzania, iyi kipe yamaze gutangira imyitozo ikaze mbere yo kuza mu Rwanda.

Umukino w’aya makipe uteganyijwe tariki 8 Nyakanga 2017 ukazabera kuri Stade ya Kigali i Nyamirambo kuko Stade Amahoro ubundi isanzwe yakira imikino ikomeye n’abafana benshi ikirimo gusanwa.

Mu bakinnyi AZAM FC yatangiranye imyitozo harimo Mwadini Ally,Benedict Haule (waguzwe uyu mwaka avuye muri Mbao FC),Metacha Mnata, Bruce Kangwa, Abbas Kapombe, Ramadhan Mohamed, Abdul Omary mu gihe abandi barimo Frank Domayo, Masoud Abdallah, Stanslaus Ladislaus na rutahizamu Yahaya Zaidi bakiri mu ikipe y’igihugu irimo gukina “COSAFA”.

Rayon Sports nayo nyuma yo gusezererwa mu gikombe cy’Amahoro na Espoir FC y’i Rusizi itsinzwe ibitego 2-1 mu mikino yombi, biteganyijwe ko abakinnyi bahabwa ikiruhuko gito mbere yo gutangira imyitozo bitegura uyu mukino no kwakira igikombe.

Uretse igikombe, iyi kipe izanahabwa miliyoni 32 z’amafaranga y’u Rwanda gusa izabyakira itakiri kumwe na bamwe mu bakinnyi bayifashije cyane uyu mwaka barimo Nshuti Dominique Savio wamaze kujya muri AS Kigali ndetse na Moussa Camara wagiye muri Ismaily Sporting Club yo mu Misiri.

Yanditswe na Chief Editor/MUHABURA.rw


Tanga igitecyerezo

Amazina
Ubutumwa

Izindi nkuru

Inkuru zikunzwe