Yashyizweho kuri1 March, 2020 | 07:17

Imikino 44 ya shampiyona Liverpool idatsindwa yasojwe na Watford

Icyizere cya Liverpool cyo gukomeza kudatsindwa muri uyu mwaka wose w’imikino cyaraye gisojwe neza na Watford yari yarubiye ku kibuga cyayo cya Vicarage Road.

Ismaïla Sarr, umukinnyi wa Watford ukina ku ruhande ukomoka muri Sénégal, yatsinze bibiri naho kapiteni Troy Deeney wa Watford ashyiramo icya gatatu mu gice cya kabiri kiryoheye ijisho cy’umukino aho akagozi k’intsinzi za Liverpool kayicikanye.

Mbere y’uwo mukino w’ejo ku wa gatandatu, Liverpool yari yaratsinze imikino 18 iheruka ndetse iyo iza gutsinda uwo mukino wa Watford yari kuba yanditse amateka yo kuba ikipe ya mbere yo muri Premier League imaze igihe kirekire itsinda.

Ariko ntiyari gukoraho kuri Watford yateye umupira unogeye ijisho kuva mu ntangiriro y’uwo mukino kugeza urangiye ndetse yahise iva mu cyiciro cy’amakipe ashobora kumanuka ava muri Premier League.

Intsinzi ya Watford ntabwo igiye gukoma mu nkokora kuba Liverpool izatwara igikombe cya shampiyona kuko ubu irusha Manchester City ya kabiri amanota 22, ariko ntibibujije ko yabaye intsinzi itari yitezwe kandi Watford itazibagirwa mu mateka.

Benshi bari bagiye ku kibuga Vicarage Road biteze kubona Liverpool yandika amateka yo kumara imikino 19 yikurikiranya idatsindwa muri shampiyona.

Mu by’ukuri ni uko byari byitezwe, n’ikimenyimenyi ku banyamakuru ibyangombwa byo gutara amakuru kuri uwo mukino byari byasabwe birenze urugero, ibitangazamakuru bibarirwa muri za magana byiteguye gutara iyo yari kuba ibaye inkuru yanditse amateka mu mupira w’amaguru w’Ubwongereza.

Ariko Watford yo yari ifite ikindi kiyiraje ishinga.

Abatoza bavuze iki?

Nigel Pearson, umutoza wa Watford, yagize ati: "Ni intsinzi y’ingenzi kuri twe. Kugeza ubu uyu mwaka w’imikino waratugoye cyane, dutsindwa mu cyumweru gishize ndetse no kudakina neza, twashakaga kwisubiraho".

"[Liverpool] Ni ikipe nziza cyane, byadusabye kwitwara neza - mu buryo bushoboka bwose - kandi ntekereza ko twari dukwiye intsinzi.

"Iyo twabaga dufashe umupira twatezaga ibibazo kandi tukarinda izamu n’ubwitonzi, ingufu n’umuhate. Ubwo ni bwo butumwa nakomeje gutanga [ku bakinnyi] kuva ku munsi wa mbere".

"Ni ibintu dushoboye, kandi tugomba kujya twitwara neza kuriya buri cyumweru".

Naho umutoza Jurgen Klopp wa Liverpool yagize ati: "Bakoze neza neza ibyo bashakaga gukora. Uko ni ko umupira w’amaguru uteye".

"Ugomba kubyakira, ntabwo byoroshye cyane, ariko ni gihamya yuko tutari tumeze neza bihagije. Iteka biba bigoye kubyakira".

Niyomugabo Albert \Muhabura.rw


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe