Yashyizweho kuri15 January, 2020 | 09:43

Haruna Niyonzima yahakanye amakuru avuga ko yanze kujyana n’ikipe ye

Haruna Niyonzima ukinira ikipe ya Yanga muri Tanzania yahakanye amakuru avuga ko yanze kujyana n’ikipe ye ya Yanga mu marushanwa ya Mapinduzi Cup yabereye Zanzibar ahubwo ko byatewe n’uko atari yiteguye neza.

Iri rushanwa ryasojwe tariki ya 13 Mutarama 2020 ikipe ya Yanga yaviriyemo muri ½ itsinzwe na Mtibwa Sugar kuri penaliti 4-2, iyi kipe ni nayo yegukanye igikombe itsinze Simba 1-0.

Haruna winjiye muri iyi kipe mu kwezi kwa 12 umwaka ushize, ntabwo yajyanye n’iyi kipe ahubwo we yasigaye Dar es Salaam, byavuzwe ko ashobora kuba yaranze kujyana n’iyi kipe.

Mu kiganiro yagiranye na Global Publishers dukesha iyi nkuru, yavuze ko ibyo ari ibinyoma ahubwo ntabwo yari yiteguye bihagije.

Yagize ati“Abantu bamvugaho byinshi, ariko ndakeka ukuri ntibakuzi, kuvuga ngo nasuzuguye yanga biraza kuba ari ikindi kintu kuri njye. Nyuma yo kugera hano nakoze imyitozo 2 na Yanga ubundi nkina umukino wa Simba SC, ntabwo byari koroha ko njya mu marushanwa na none ntakoze imyiteguro ihagije.”

Uyu mugabo ugarutse muri Yanga ku nshuro ya 2 nyuma yo gutandukana na yo muri 2017, yavuze ko yaje muri Yanga kuyifasha kwegukana ibikombe bityo ko atakora ikintu cyabangamira akazi ke.

Muhabura.rw


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe