Yashyizweho kuri15 July, 2019 | 12:02

Griezmann avuga ko uko Atletico yitwaye nyuma yo kujya muri Barcelone ’bibabaje’

Umukinnyi Antoine Griezmann w’ikipe ya Barcelone yavuze ko uburakari ikipe yahoze akinamo ya Atletico Madrid yagaragaje kubera kujya muri Barcelone kwe ari "ikintu kibabaje".

Griezmann yageze muri Barcelone ku wa gatanu w’icyumweru gishize kuri kontaro y’imyaka itanu, nyuma yaho Barca yemeye gutanga miliyoni 120 z’ama-euro akubiye muri kontaro ye na Atletico Madrid mu gihe yaba ayivuyemo.

Atletico yinubiye ko Barcelone na Griezmann bari baragiranye amasezerano mbere yuko ayo mafaranga y’ikipe yari kumugura avanwa kuri miliyoni 200 z’ama-euro mu ntangiriro y’uku kwezi kwa karindwi.

Ko rero ayo miliyoni 120 z’ama-euro "adahagije".

Ubu Griezmann ni mukinnyi wa gatandatu mu baguzwe amafaranga menshi cyane ku isi, inyuma ya Neymar, Kylian Mbappe, Philippe Coutinho, Joao Felix na Ousmane Dembele.

Amakuru yo mu bitangazamakuru byo muri Espanye yo mu mpera y’icyumweru avuga ko Atletico ifite gahunda yo kugeza ikirego ku ishyirahamwe ry’umupira w’amaguru ku isi (FIFA).

Ivuga ko Barcelone hari amafaranga yayisigayemo arenga kuri izo miliyoni 120 z’ama-euro.

Ubwo yari mu kiganiro n’abanyamakuru agaragazwa nk’umukinnyi mushya wa Barcelone, Griezmann wafashije Atletico kwegukana Europa League mu mwaka ushize wa 2018 yagize ati:

"Ibijyanye na Atletico, birababaje. Nagiye kubareba [abayobozi] ku bushake ngo mbibamenyeshe ntibazatungurwe kandi bitegure mu gihe nzaba ntagihari".

Uyu Mufaransa w’imyaka 28 y’amavuko, yatsindiye Atletico ibitego 133 mu mikino 257 yayikiniye. Yayigezemo mu 2014 avuye muri Real Sociedad.

Ejo ku cyumweru yahuye n’abagenzi be bashya bazajya bakinana muri Barcelone, akaba azajya yambara nimero 17.

JPEG - 57.8 kb
Griezmann ari kumwe n’abo mu ikipe y’abana ya Barcelone
JPEG - 44.5 kb
Griezmann na Josep Maria Bartomeu, Perezida w’ikipe ya Barcelone

Niyomugabo Albert/ Muhabura.rw


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe