Yashyizweho kuri9 July, 2019 | 22:19

CECAFA Kagame Cup: Rayon Sports yisengereye Atlabara FC iyitsinda ibitego 2-0 bya Jules Ulimwengu[REBA AMAFOTO]

Umukino wa kabiri Rayon Sports yakinnye mu irushanwa rya CECAFA Kagame Cup yatsinze Atlabara FC yo muri Sudan y’Epfo ibitego 2-0 byatsinzwe na rutahizamu Jules Ulimwengu wanujuje ibitego bitatu mu irushanwa.

Kuri uyu mukino,umutoza wa Rayon Sports, Mathurin Ovambe Olivier ukomoka muri Cameroun yagaruye ikipe yabanjemo ku mukino wa TP Mazembe.

Ni umupira watangiye ikipe ya Rayon Sports igaragara ko ishaka intsinzi ngo yizere kujya muri 1/4 aho Iranzi Jean Claude ku munota wa 7’ yateye umupira ukagonga ipoto.

Ubwo ikipe ya Rayon Sports yakomeje kotsa igitutu Atlabara ari nabwo ku munota wa 15’ yafunguye amazamu ku gitego cyatsinzwe na Ulimwengu Jules uhawe umupira mwiza na Iradukunda Eric Radu nyuma yo guherezwa na Iranzi ku mupira wari uturutse kuri Nshimiyimana Imran.

Rayon Sport ntiyanyuzwe n’icyo gitego ngo ibe yacika intege kuko yakomeje gutira ihita ibona penarite mu minota itatu y’inyongera y’igice cya mbere nyuma y’ikosa ryakozwe n’umukinnyi wa Atlabara Mustafa Salim yakoreye kuri Ciza Hussein mu rubuga rw’amahina,izaguterwa na Iranzi Jean Claude ku bw’amahirwe make arayihusha.

Igice cya mbere kirangira itsinzi ari iya Rayon Sports y’igitego 1-0.

Igice cya kabiri cyatangiye n’ubundi Rayon Sports igaragaza imbaraga zidasanzwe aho byagaragaraga ko abakinnyi bashya bamaze kumenyerana n’abasanzwe.

Muri icyo gice Rayon Sports yahushije ibitego byinshi birimo icya Mugheni Fabrice wateye umupira n’umutwe ugaca hejuru gato y’izamu rya Atlabara FC.Rayon Sports yihariye umukino aho abakinnyi nka ba Irakoze Saidi na Rugwiro nabo bahushije ibitego byari byabazwe.

Byageze ku munota wa 79’ Rayon Sports ihita ibona igitego cya kabiri cyatsinzwe nanone na Jules Ulimwengu giturutse ku mupira Mugheni Fabrice yahinduriye mu rubuga rw’amahina, amaze kuwuhabwa na Bizimana Yannick akimara kwinjira mu kibuga.

Umukino wahuzaga Rayon Sports n’ikipe ya Atlabala yo muri Sudani y’Epfo warangiye Rayon Sports yegukanye itsinzi y’ibitego 2-0 bwa Atlabara binatuma ihita igira amanota atandatu binayiha kugera muri ¼.

Muri iritsinda umukino wabanjije TP Mazembe yatsinze KMC igitego 1-0.

Abakinnyi ku ruhande rwa Atlabara FC,Morris Michael yakoresheje:

Khamis Daniel
Mutawakil Abdelkarim
Mustafa Salim
Yakub Adam
Buay Lam
Peter Sunday
Mandela Malish
Okena Pixy
Nelson Mandela
Jimmy Michel
Obeyono Philip Edisiri

Abakinnyi bitabajwe ku ruhande rwa Rayon Sports

Kimenyi Yves
Iragire Saidi
Rugwiro Herve
Iradukunda Eric Radu,
Rutanga Eric (c)
Nshimiyimana Amran
Mugheni Kakule Fabrice
Comodore Olokwei
Ciza Hussein
Iranzi Jean Claude
Ulimwengu Jules

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe