Yashyizweho kuri2 April, 2018 | 11:30

Amakipe 11 yo mu cyiciro cya mbere ashobora kutazakina Shampiyona umwaka utaha

Amakipe agera kuri 11 muri shampiyona y’icyiciro cya mbere mu Rwanda yaterwaga inkunga n’uturere hafi 90% ari mu mazi abira kubera imyanzuro yafatiwe, ishobora gutuma yose asenyuka mu mwaka w’imikino utaha azize kubura amikoro mugihe niharamuka hashyizwe mu bikorwa imyanzuro yafatiwe mu mwiherero w’abayobozi b’inzego z’ibanze.

Umwanzuro ukomeye ndetse uteye n’ubwoba wateye benshi mu bayobozi b’amakipe y’uturere impungege uvuga ko nta ngengo y’imari y’ikipe runaka izongera kubaho mu karere ndetse ingengo y’imari ya siporo muri rusange itazongera kurenza miliyoni 60.

Ibi bivuze ko ingengo y’imari y’amakipe akina imikino itandukanye mu karere izajya ihabwa miliyoni 60 gusa aho guha amakipe ya ruhago ingengo y’imari iri hejuru nkuko byakorwaga.

Ibi bivuze ko amakipe agiye kwiruka ku baterankunga izagera mu ntangiriro z’umwaka w’imikino utaha itarabona umuterankunga izasenyuka aho amakipe atandukanye ashobora kuzahahurira n’ingorane zitoroshye dore ko zacyeshaga gukina shampiyona n’inkunga zaterwaga n’uturere twayo.

Amakipe asanzwe abonera akaryo mu turere abarizwamo ni aya akurikira ndetse n’inkunga yahabwaga:

Bugesera yahabwaga n’akarere ka Bugesera miliyoni 140 frw
Mukura yahabwaga n’akarere ka Huye miliyoni 100frw
Espoir yahabwaga n’akarere ka Rusizi miliyoni 120frw
Kirehe yahabwaga n’akarere ka Kirehe miliyoni 100 frw
Etiencelles yahabwaga n’akarere ka Rubavu miliyoni 125frw
Amagaju yahabwaga n’akarere ka Nyamagabe miliyoni 80 frw
Kiyovu yahabwaga n’akarere ka Nyarugenge miliyoni 60 frw
Sunrise yahabwaga n’akarere ka Nyagatare miliyoni 120frw
Gicumbi yahabwaga n’akarere ka Gicumbi miliyoni 45 frw
AS Kigali yahabwaga n’Umujyi wa Kigali miliyoni 250 frw
Musanze yahabwaga n’akarere ka Musanze miliyoni 120 frw.
Uyu mwanzuro ntabwo ureba amakipe atanu(5) adaterwa inkunga n’uturere bicyekwa ko ashobora kuzaba ariyo akina shampiyona umwaka utaha niba iyi myanzuro yafatiwe mu mwiherero w’abayobozi b’inzego z’ibanze ukurikijwe.
Ayo makipe harimo, Rayon sports ,Police FC, APR FC ,Miroplast na Marines FC.

Imyanzuro ikakaye yafatiwe mu mwiherero w’abayobozi b’inzego z’ibanze

1.Nta ngengo y’imari y’ikipe izongera kuba mu karere,hazabaho ingengo y’imari ya siporo muri rusange

2. Nta Ngengo y’imari ya siporo muri rusange mu karere izongera kurenga milliyoni 60.

3. Nta muyobozi mu nzego z’ibanze njyanama na Nyobozi cg umukozi w’akarere wemerewe kuba mu buyobozi bw’i kipe

4. Ikipe y’akarere igomba gukinisha umubare munini w’abakinnyi bakomoka muri ako karere.

Umwiherero w’abayobozi b’inzego z’ibanze watangijwe na Nyakubahwa perezida Paul Kagame ku wa Gatatu tariki ya 28 Werurwe 2018 usozwa ku wa 30 Werurwe 2018 nyuma y’iminsi itatu wamaze ubera mu ishuri rya FAWE mu Karere ka Gasabo.

Gusa ntacyo ishyirahamwe ry’umupira w’amaguru mu Rwanda FERWAFA ryari bwavuge kuri iyi myanzuro n’uburyo biramutse bigenze gutya ryabyitwaramo mugihe abanyamuryango baryo batari bacye baba bagiye guhura n’imbogamizi zatuma batitabira shampiyona.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru